২১ জুন অসমত NEET পৰীক্ষা অনুষ্ঠিত হ’ব। এই পৰীক্ষাৰ বাবে মুখ্যমন্ত্ৰী ড০ হিমন্ত বিশ্ব শৰ্মাই পৰীক্ষাটো মুক্ত, নিকা আৰু স্বচ্ছতাৰে অনুষ্ঠিত কৰাটো নিশ্চিত কৰিবলৈ এখন বৈঠক অনুষ্ঠিত কৰে।
মুখ্যমন্ত্ৰী ড০ হিমন্ত বিশ্ব শৰ্মাই বুধবাৰে অহা ২১ জুনত অনুষ্ঠিত হ’বলগীয়া পুনৰ নিৰ্ধাৰিত NEET-UG পৰীক্ষাৰ প্ৰস্তুতিৰ পৰ্যালোচনা কৰে । নীট পৰীক্ষাটো মুক্ত, নিকা আৰু স্বচ্ছতাৰে অনুষ্ঠিত কৰাটো নিশ্চিত কৰিবলৈ মুখ্যমন্ত্ৰী গৰাকীয়ে বিষয়াসকলক নিৰ্দেশ দিয়ে।
এখন উচ্চস্তৰীয় বৈঠকত আলোচনা কৰি মুখ্যমন্ত্ৰীগৰাকীয়ে পৰীক্ষাৰ অনিয়মৰ বিৰুদ্ধে ৰাজ্যখনৰ “শূন্য সহনশীলতা” নীতিৰ কথা দোহাৰে আৰু যিকোনো ধৰণৰ খেলিমেলি ৰোধ কৰিবলৈ ত্ৰুটিহীন ব্যৱস্থা গ্ৰহণৰ ওপৰত গুৰুত্ব আৰোপ কৰে।
বৈঠকৰ অন্তত মুখ্যমন্ত্ৰী গৰাকীয়ে কয় যে অসমে সদায় পৰীক্ষা প্ৰক্ৰিয়াৰ সুৰুঙা সমূহ দূৰ কৰাৰ কাৰণে কঠোৰ পদক্ষেপ গ্ৰহণ কৰি আহিছে।
বৰ্ধিত নিৰাপত্তা প্ৰট’কলৰ অংশ হিচাপে সকলো পৰীক্ষাৰ্থী সকলক পৰীক্ষা কেন্দ্ৰত প্ৰৱেশ কৰাৰ পূৰ্বে ডাবল লেয়াৰ ফ্ৰিস্কিং কৰা হ’ব। কৰ্তৃপক্ষই অনাধিকাৰ প্ৰৱেশ ৰোধ কৰিবলৈ আৰু আইন-শৃংখলা বজাই ৰাখিবলৈ সকলো পৰীক্ষাকেন্দ্ৰৰ ১০০ মিটাৰ ব্যাসাৰ্ধৰ ভিতৰত ১৪৪ ধাৰা জাৰি কৰা হ’ব।
ইলেক্ট্ৰনিক সঁজুলি আৰু যোগাযোগৰ মাধ্যমসমূহৰ ব্যৱহাৰ ৰোধ কৰাৰ বাবে এক ডাঙৰ পদক্ষেপ হিচাপে পৰীক্ষাকেন্দ্ৰসমূহত ম’বাইল জামাৰ (mobile jammers) সংস্থাপন কৰা হ’ব। সকলো পৰীক্ষাকেন্দ্ৰ চিচিটিভিৰ নিৰীক্ষণত থাকিব আৰু পৰীক্ষাৰ পূৰ্বে, চলি থকা সময়ত আৰু পৰীক্ষাৰ পিছত কেন্দ্ৰসমূহৰ নিৰাপত্তা নিশ্চিত কৰিবলৈ চৌবিশ ঘণ্টাই আৰক্ষী মোতায়েন কৰা হ’ব।
প্ৰক্ৰিয়াটোৰ বিশ্বাসযোগ্যতা অধিক শক্তিশালী কৰিবলৈ, প্ৰশ্নকাকতসমূহ সামৰিক বিষয়াৰ তত্ত্বাৱধানত পৰিবহন কৰা হ’ব, যাতে ইয়াৰ সৈতে হেতালি খেলা বা প্ৰশ্নকাকত ফাদিল হোৱাৰ আশংকা হ্ৰাস কৰিব পৰা যায়।
ৰাজ্য চৰকাৰে বৈধ NEET প্ৰৱেশ পত্ৰ (admit card) থকা পৰীক্ষাৰ্থীসকলৰ বাবে অসম ৰাজ্যিক পৰিবহন নিগম (ASTC)ৰ বাছত বিনামূলীয়া যাত্ৰাৰ সুবিধাও ঘোষণা কৰিছে, যাৰ ফলত পৰীক্ষাকেন্দ্ৰলৈ যোৱা শিক্ষাৰ্থীসকলে যাতায়তৰ ক্ষেত্ৰত সহায় পাব।
বিষয়াসকলে মুখ্যমন্ত্ৰীক অৱগত কৰে যে পৰীক্ষাটো সুচাৰুৰূপে পৰিচালনা কৰাৰ বাবে শিক্ষা, পৰিবহন আৰু আৰক্ষী বিভাগকে ধৰি বিভিন্ন বিভাগৰ মাজত এক সৰ্বাংগীণ সমন্বয় গঢ়ি তোলা হৈছে।
২১ জুনৰ NEET-UG পুনৰীক্ষাত অসমৰ হাজাৰ হাজাৰ পৰীক্ষাৰ্থীয়ে অংশগ্ৰহণ কৰিব বুলি আশা কৰা হৈছে। বহুস্তৰীয় নিৰাপত্তা আৰু নিৰীক্ষণ ব্যৱস্থাৰ জৰিয়তে ৰাজ্য চৰকাৰে পৰীক্ষাটো সৰ্বোচ্চ পৰ্যায়ৰ নিকা, স্বচ্ছ আৰু বিশ্বাসযোগ্যতাৰে অনুষ্ঠিত কৰাৰ লক্ষ্য ৰাখিছে।
লগতে পঢ়ক: স্কুল বেগৰ ওজনক লৈ মহানগৰীৰ বিদ্যালয়লৈ শিক্ষা বিভাগৰ নিৰ্দেশনা
