শতবৰ্ষত সুধাকণ্ঠ! ভূপেন হাজৰিকাক স্মৰণ প্ৰধানমন্ত্ৰী মোদী, মুখ্যমন্ত্ৰীৰ।
৮ ছেপ্টেম্বৰ, মঙলবাৰে অসমে কিংবদন্তি শিল্পী, সংগীত পৰিচালক আৰু চলচ্চিত্ৰ নিৰ্মাতা ড০ ভূপেন হাজৰিকাৰ ১০০সংখ্যক জন্মজয়ন্তী পালন কৰিছে। গুৱাহাটীৰ ভূপেন হাজৰিকা সমন্বয় তীৰ্থত ‘সুধাকণ্ঠ’ৰ স্মৃতিসৌধত শ্ৰদ্ধাঞ্জলি জ্ঞাপন কৰাৰ লগতে তেওঁৰ জীৱন আৰু সংগীত তথা সংস্কৃতিলৈ আগবঢ়োৱা অৱদানক স্মৰণ কৰা হয় (Bhupen Hazarika birth centenary)।
২০১১ চনৰ নৱেম্বৰ মাহত সাংস্কৃতিক মহীৰূহগৰাকীৰ শেষকৃত্য সম্পন্ন কৰা স্থানত নিৰ্মাণ কৰা ভূপেন হাজৰিকা সমন্বয় তীৰ্থত সমাজৰ বিভিন্ন শ্ৰেণীৰ লোক সমবেত হয়। বিদ্যালয়-মহাবিদ্যালয়ৰ ছাত্ৰ-ছাত্ৰী, কৰ্মচাৰী আৰু সংগীতপ্ৰেমীৰ লগতে ৰাজনৈতিক নেতা আৰু জনপ্ৰতিনিধিসকলেও মহান শিল্পীগৰাকীক শ্ৰদ্ধাঞ্জলি জ্ঞাপন কৰে (Bhupen Hazarika Samannay Tirtha)।
অসমৰ ৰাজ্যপাল লক্ষ্মণ প্ৰসাদ আচাৰ্য, মুখ্যমন্ত্ৰী হিমন্ত বিশ্ব শৰ্মা আৰু প্ৰদেশ কংগ্ৰেছৰ সভাপতি গৌৰৱ গগৈয়ে স্মৃতিসৌধত ভূপেন হাজৰিকাৰ প্ৰতি শ্ৰদ্ধা নিবেদন কৰে।
সামাজিক মাধ্যমত মুখ্যমন্ত্ৰী ড০ হিমন্ত বিশ্ব শৰ্মাই বিশ্ব বৰেণ্য অসমীয়াগৰাকীক স্মৰণ কৰি কয়-“সুধাকণ্ঠ ড° ভূপেন হাজৰিকা অসমৰ বাবে এটি মাত্র নাম নহয়, তেখেত এটি বিশ্ববন্দিত সত্তা, সুবৃহৎ অনুষ্ঠান সদৃশ তেখেত৷ মহাবাহু ব্ৰহ্মপুত্ৰৰ জলধাৰা যেতিয়ালৈ বৈ থাকিব, আমাৰ আপোন বিহুটি যেতিয়ালৈ অসমীয়াৰ ৰন্ধ্রে-ৰন্ধ্রে প্ৰবাহিত হৈ থাকিব, অসমীয়াৰ মন-মগজু ভূপেন্দ্ৰ-জ্যোতিৰ দ্বাৰা আলোকিত হৈ থাকিব৷ সুধাকণ্ঠ আমাৰ বাবে চিৰসেউজ এটি সত্তা (Bhupen Hazarika birth anniversary)।
ভূপেনদাৰ জীৱনৰ কিছু স্মৃতিৰ জিলিঙনিৰে আজি প্ৰাণৰ শিল্পীজনাৰ পৱিত্ৰ জন্মবার্ষিকীত অসমবাসীৰ হৈ বিনম্ৰ শ্ৰদ্ধাঞ্জলি জ্ঞাপন কৰিলোঁ৷”
মুখ্যমন্ত্ৰী ড০ শৰ্মাই স্মৰণ কৰে যে প্ৰধানমন্ত্ৰী মোদীয়ে যোৱা বছৰ ছেপ্টেম্বৰ মাহত ভূপেন হাজৰিকাৰ জন্মশতবাৰ্ষিকী উপলক্ষে বছৰজোৰা উদযাপনৰ শুভাৰম্ভ কৰিছিল। তেওঁৰ মতে, এই পদক্ষেপে সমগ্ৰ দেশতে ‘সুধাকণ্ঠ’ৰ অসাধাৰণ জীৱন আৰু অমৰ অৱদানক উদযাপন কৰিবলৈ অনুপ্ৰেৰণা যোগাইছিল।
মুখ্যমন্ত্ৰী ড০ শৰ্মাই ‘এক্স’ত কৰা পোষ্টত কয়, “তেওঁৰ ব্যক্তিগত দিক-নিৰ্দেশনা আৰু অংশগ্ৰহণৰ বাবে আমি গভীৰভাৱে কৃতজ্ঞ।” লগতে তেওঁ কয় যে চলিত বছৰৰ শেষৰ ফালে নতুন দিল্লীত অনুষ্ঠিত হ’বলগীয়া জন্মশতবাৰ্ষিকীৰ সামৰণি অনুষ্ঠানত মোদীৰ উপস্থিতিৰ বাবে অসমে আগ্ৰহেৰে অপেক্ষা কৰিছে।
প্ৰধানমন্ত্ৰী নৰেন্দ্ৰ মোদীয়ে সামাজিক মাধ্যমত মহান অসমীয়াগৰাকীক স্মৰণ কৰি কয়- “ড০ ভূপেন হাজৰিকা দেৱৰ ১০০সংখ্যক জন্মজয়ন্তীত কিংবদন্তি শিল্পীগৰাকীক শ্ৰদ্ধাৰে স্মৰণ কৰিছোঁ। তেওঁৰ কণ্ঠই অসমৰ আত্মা আৰু উত্তৰ-পূৰ্বাঞ্চলৰ চেতনাক সমগ্ৰ দেশলৈ কঢ়িয়াই লৈ গৈছিল। তেওঁৰ সংগীতৰ জৰিয়তে অগণন মানুহৰ চিন্তা-চেতনা আৰু অন্তৰৰ ভাবনাক সুন্দৰভাৱে প্ৰকাশ কৰিছিল। তেওঁৰ গীতসমূহে মানুহক ইজনে-সিজনৰ অধিক ওচৰ চপাই আনিছিল।
যোৱা বছৰ গুৱাহাটীত অনুষ্ঠিত তেওঁৰ জন্মশতবাৰ্ষিকী উদযাপনৰ শুভাৰম্ভ অনুষ্ঠানত অংশগ্ৰহণ কৰাৰ কথা মই উমৈহতীয়াভাৱে স্মৰণ কৰিছোঁ। ভূপেন দাৰ জীৱন আৰু কৰ্মই আগন্তুক প্ৰজন্মসমূহকো অনুপ্ৰাণিত কৰি থাকিব।“
লগতে পঢ়ক: মেট্ৰিক আৰু HS চূড়ান্ত পৰীক্ষাক লৈ ডাঙৰ সিদ্ধান্ত!
