অসমৰ মুখ্যমন্ত্ৰী ড০ হিমন্ত বিশ্ব শৰ্মাই ২ আগষ্ট দেওবাৰে ৰাজ্যজুৰি আৰম্ভ হোৱা লোকপিয়ল ২০২৭ৰ আত্মগণনা অনুশীলনত অংশগ্ৰহণ কৰিবলৈ ৰাজ্যবাসীক আহ্বান জনোৱাৰ লগতে নাগৰিকসকলক অনলাইনযোগে সবিশেষ পূৰণ কৰাৰ সমান্তৰালকৈ সঠিক তথ্য দাখিল কৰিবলৈ আহ্বান জনায়।
দেওবাৰ, ২ আগষ্টত অসমৰ মুখ্যমন্ত্রী ড০ হিমন্ত বিশ্ব শৰ্মাই ৰাজ্যজুৰি আৰম্ভ হোৱা ‘লোকপিয়ল ২০২৭’ৰ স্ব-গণনা (Self-enumeration) প্ৰক্ৰিয়াত অংশগ্ৰহণ কৰিবলৈ ৰাইজক আহ্বান জনায়। তেওঁ অনলাইনযোগে নিজৰ তথ্যসমূহ দাখিল কৰোঁতে সঠিক আৰু শুদ্ধ তথ্য প্ৰদান কৰিবলৈও নাগৰিকসকলক অনুৰোধ জনায়।
মুখ্যমন্ত্ৰীগৰাকীয়ে নিজেও নিজৰ স্ব-গণনা সম্পন্ন কৰে আৰু ৰাজ্যবাসীকো এই প্ৰক্ৰিয়াত অংশগ্ৰহণ কৰিবলৈ উৎসাহিত কৰে। ছ’চিয়েল মিডিয়াত দিয়া এটা পোষ্টত মুখ্যমন্ত্ৰী গৰাকীয়ে কয়, “আজি অসমত ‘লোকপিয়ল ২০২৭’ৰ অনলাইন স্ব-গণনা প্ৰক্ৰিয়াৰ সূচনা হৈছে, য’ত আপুনি ঘৰতে আৰামেৰে বহি নিজৰ তথ্যসমূহ পূৰণ কৰিব পাৰিব। মই কিছু সময়ৰ আগতে মোৰ তথ্য পূৰণ কৰিলো। সকলোকে নিজৰ তথ্যসমূহ সঠিকভাৱে জমা দি এই বিশাল কাৰ্যসূচীৰ অংশ হ’বলৈ অনুৰোধ জনালোঁ।”
এটা ভিডিঅ’ বাৰ্তাত মুখ্যমন্ত্ৰীগৰাকীয়ে শুদ্ধ তথ্য প্ৰদান কৰিবলৈ আৰু এই ৰাষ্ট্ৰীয় লোকপিয়ল কাৰ্যসূচীত অংশ লৈ দায়িত্বশীল নাগৰিকৰ কৰ্তব্য পালন কৰিবলৈ আহ্বান জনায়।
অনলাইন স্ব-গণনাৰ এই সুবিধা ২ আগষ্টৰ পৰা ১৬ আগষ্টলৈ লোকপিয়লৰ আনুষ্ঠানিক স্ব-গণনা পৰ্টেলৰ জৰিয়তে মুকলি থাকিব, য’ত নাগৰিকসকলে নিজৰ পৰিয়াল আৰু ব্যক্তিগত তথ্য ডিজিটেলভাৱে দাখিল কৰিব পাৰিব।
অনলাইন স্ব-গণনাৰ পৰ্যায় শেষ হোৱাৰ পাছত ১৭ আগষ্টৰ পৰা ১৫ ছেপ্টেম্বৰলৈ গৃহ তালিকাভুক্তকৰণ (HLO) আৰু গৃহ লোকপিয়লৰ কাম অনুষ্ঠিত হ’ব।
অৱশ্যে, সাম্প্ৰতিক ভয়াবহ বান পৰিস্থিতিৰ বাবে আটাইতকৈ বেছি ক্ষতিগ্রস্ত শিৱসাগৰ আৰু চৰাইদেউ জিলাত এই লোকপিয়ল কাৰ্যসূচী স্থগিত ৰখা হৈছে।
এই স্ব-গণনা পদক্ষেপ হৈছে ‘লোকপিয়ল ২০২৭’ৰ প্ৰস্তুতিৰ অংশ, যাৰ জৰিয়তে ফিল্ড ভেৰিফিকেচন বা ক্ষেত্ৰভিত্তিক সত্যাপন আৰম্ভ হোৱাৰ পূৰ্বে নাগৰিকসকলে প্ৰাৰম্ভিক পৰ্যায়ৰ কাম-কাজখিনি নিজেই অনলাইনযোগে সম্পূৰ্ণ কৰিব পাৰিব।
লগতে পঢ়ক: ২ আগষ্টৰ পৰা আৰম্ভ হ’ব লোকপিয়ল! মোবাইলতে নিজেই দিব পাৰিব নিজৰ তথ্য
