বুধবাৰে আৰৱ সাগৰত ভাৰত আৰু পাকিস্তানৰ নৌসেনাৰ জাহাজৰ সংঘৰ্ষ হয়। এই বিষয়ত পাকিস্তানৰ নৌসেনাৰ অৱহেলাৰ এক বৃহৎ দৃষ্টান্ত পোহৰলৈ আহিছে।
ভাৰত আৰু পাকিস্তানৰ মাজত সম্পৰ্ক বিগত কিছু সময়ৰ পৰা ক্ৰমাগতভাৱে অৱনতি ঘটিছে। ইয়াৰ মাজতে আৰৱ সাগৰত এনে এক ঘটনা সংঘটিত হৈছে, যিয়ে দুয়োখন দেশৰ মাজত উত্তেজনা আৰু অধিক বৃদ্ধি কৰিব পাৰে। তথ্য অনুসৰি, বুধবাৰে উত্তৰ আৰৱ সাগৰত ভাৰতীয় নৌসেনা আৰু পাকিস্তান নৌসেনাৰ জাহাজৰ মাজত সাগৰৰ বুকুত মুখামুখি সংঘৰ্ষ ঘটে। ভাৰতে এই ঘটনাক লৈ তীব্র প্ৰতিবাদ সাব্যস্ত কৰিছে আৰু পাকিস্তানক চুক্তিৰ সন্মান জনাবলৈ সকিয়নী দিছে। জানিব পৰা মতে, নতুন দিল্লীত থকা পাকিস্তান উচ্চায়োগৰ ভাৰপ্ৰাপ্ত বিষয়া (চাৰ্জ ডি এফেয়াৰ্ছ)ক বৈদেশীক পৰিক্ৰমা মন্ত্ৰালয়লৈ তলব কৰা হৈছে।
ভাৰতীয় নৌসেনাৰ তৰফৰ পৰা দিয়া তথ্য অনুসৰি, ১৬ ছেপ্টেম্বৰত উত্তৰ আৰৱ সাগৰত নিয়মীয়া নিৰীক্ষণ অভিযানৰ সময়ত পাকিস্তান নৌসেনাৰ এখন জাহাজ ভাৰতীয় নৌসেনাৰ এখন ফ্ৰণ্টলাইন যুদ্ধজাহাজৰ কাষ চাপি আহে।জানিব পৰা মতে, পাকিস্তানৰ জাহাজখন অতি দ্ৰুত গতিৰে আহি আছিল আৰু অসুৰক্ষিত তথা অপেশাদাৰীভাৱে চলাচল কৰি আছিল। এই কাৰণতে দুয়োখন জাহাজৰ মাজত সংঘৰ্ষ হয়। অৱশ্যে, এই ঘটনাৰ ফলত কোনো ক্ষতি হোৱাৰ খবৰ পোৱা যোৱা নাই। ভাৰতীয় নৌসেনাৰ নিয়মীয়া নিৰীক্ষণ অভিযানৰ সময়তে সমগ্ৰ ঘটনাটো সংঘটিত হয়।
এই সমগ্ৰ বিষয়টো পোহৰলৈ অহাৰ পাছত ভাৰতে তীব্ৰ প্ৰতিবাদ ব্যক্ত কৰিছে। নতুন দিল্লীত থকা পাকিস্তান উচ্চায়োগৰ চাৰ্জ ডি এফেয়াৰ্ছক বৈদেশীক পৰিক্ৰমা মন্ত্ৰালয়লৈ তলব কৰা হয়। এই সময়ছোৱাত পাকিস্তান নৌসেনাৰ গ্ৰহণযোগ্য নোহোৱা আৰু অপেশাদাৰী আচৰণৰ বিৰুদ্ধে তীব্ৰ প্ৰতিবাদ সাব্যস্ত কৰা হয়। এই ঘটনা আন্তঃৰাষ্ট্ৰীয় জলসীমাত সংঘটিত হৈছিল আৰু ইয়াত বিশেষ ক্ষতি হোৱা নাই যদিও, ইয়াক ১৯৯১ চনৰ এপ্ৰিল মাহত ভাৰত আৰু পাকিস্তানৰ মাজত সামৰিক অনুশীলন, যুদ্ধাভ্যাস আৰু সেনাৰ চলাচলৰ পূৰ্ব তথ্য প্ৰদান সংক্ৰান্তীয় চুক্তিৰ ১০ নং অনুচ্ছেদৰ প্ৰত্যক্ষ উলংঘন বুলি অভিহিত কৰা হৈছে।
ভাৰত চৰকাৰে পাকিস্তান উচ্চায়োগৰ চাৰ্জ ডি এফেয়াৰ্ছক পৰামৰ্শ দিছে যে তেওঁ নিজৰ দেশৰ বিষয়াসকলক এই কথা অৱগত কৰোৱা উচিত যাতে এনে ধৰণৰ ঘটনা পুনৰাবৃত্তি নহ’বলৈ সকলো সামৰিক গোটে উপযুক্ত সাৱধানতা অৱলম্বন কৰে। ইয়াৰ উপৰি ভাৰত আৰু পাকিস্তানৰ মাজত হোৱা চুক্তিৰ ব্যৱস্থাসমূহকো সন্মান জনোৱা উচিত। ইয়াৰ সমান্তৰালভাৱে বৈদেশীক পৰিক্ৰমা মন্ত্ৰালয়ে পাকিস্তানৰ ইছলামাবাদত থকা ভাৰতৰ চাৰ্জ ডি এফেয়াৰ্ছকো পাকিস্তানৰ বৈদেশিক মন্ত্ৰালয়ৰ ওচৰত অনুৰূপ প্ৰতিবাদ সাব্যস্ত কৰিবলৈ নিৰ্দেশ দিছে।
