গুৱাহাটী বিশ্ববিদ্যালয়ৰ আন্তঃগাঁথনিত নতুন গতি, ১১০ কোটিৰ প্ৰকল্পৰ শুভাৰম্ভ
সোমবাৰে গুৱাহাটী বিশ্ববিদ্যালয়ত ১১০ কোটি টকা ব্যয়সাপেক্ষ আন্তঃগাঁথনি উন্নয়নমূলক প্ৰকল্পৰ আধাৰশিলা স্থাপন কৰে দেশৰ উপ-ৰাষ্ট্ৰপতি চি পি ৰাধাকৃষ্ণনে। এই প্ৰকল্পসমূহে অসম চৰকাৰে বিশ্ববিদ্যালয়খনৰ আন্তঃগাঁথনি উন্নয়নৰ বাবে ঘোষণা কৰা ২৫০ কোটি টকাৰ বৃহৎ প্ৰতিশ্ৰুতিৰ প্ৰথম পৰ্যায়ক প্ৰতিনিধিত্ব কৰিছে (Gauhati University Development)।
উপ-ৰাষ্ট্ৰপতিৰ ওপৰিও অসমৰ ৰাজ্যপাল তথা গুৱাহাটী বিশ্ববিদ্যালয়ৰ আচাৰ্য লক্ষ্মণ প্ৰসাদ আচাৰ্য আৰু মুখ্যমন্ত্ৰী ড০ হিমন্ত বিশ্ব শৰ্মাই এই কাৰ্যসূচীত অংশগ্ৰহণ কৰে (Gauhati University Infrastructure)।
এই প্ৰকল্পসমূহৰ লক্ষ্য হৈছে বিশ্ববিদ্যালয়খনৰ শৈক্ষিক আৰু আৱাসিক আন্তঃগাঁথনি অধিক শক্তিশালী কৰা। প্ৰকল্পসমূহৰ ভিতৰত আছে- এটা শৈক্ষিক ভৱন, ছাত্ৰাবাস, আধুনিক মেছ ভৱন, আন্তঃৰাষ্ট্ৰীয় ছাত্ৰাবাস, কৃষ্ণকান্ত সন্দিকৈ গ্ৰন্থাগাৰ-ছেমিনাৰ হলৰ সংস্কাৰ, বিৰিঞ্চি কুমাৰ বৰুৱা প্ৰেক্ষাগৃহৰ উন্নীতকৰণ আৰু ডি-গ্ৰেড কৰ্মচাৰীৰ বাবে আৱাসিক কোৱাৰ্টাৰ (Assam Education News)।
১১০ কোটি টকাৰ প্ৰথম পৰ্যায়টোক গুৱাহাটী বিশ্ববিদ্যালয়ৰ আন্তঃগাঁথনি উন্নয়নৰ বাবে ৰাজ্য চৰকাৰে কৰা ২৫০ কোটি টকাৰ প্ৰতিশ্ৰুতি পূৰণৰ দিশত এক গুৰুত্বপূৰ্ণ পদক্ষেপ হিচাপে গণ্য কৰা হৈছে। এই প্ৰকল্পসমূহ সম্পূৰ্ণ হ’লে ছাত্ৰ-ছাত্ৰী, শিক্ষক-শিক্ষয়িত্ৰী আৰু বিশ্ববিদ্যালয়ৰ অন্যান্য সদস্যসকলৰ সুবিধা যথেষ্ট বৃদ্ধি পাব বুলি আশা কৰা হৈছে।
এই কাৰ্যসূচীতে উপ-ৰাষ্ট্ৰপতি চি পি ৰাধাকৃষ্ণনে ‘চন্দ্ৰকান্ত অভিধান’ৰ পঞ্চম সংশোধিত আৰু পৰিৱৰ্ধিত সংস্কৰণ আৰু ‘Bhupen Hazarika- Hundred Years of a Wandering Song’ শীৰ্ষক গ্ৰন্থখনো উন্মোচন কৰে।
অনুষ্ঠানৰ অংশ হিচাপে গুৱাহাটী বিশ্ববিদ্যালয়ৰ ছাত্ৰ-ছাত্ৰী, শিক্ষক-শিক্ষয়িত্ৰী আৰু বিশিষ্ট নাগৰিকসকলৰ সৈতে এখন ৰাজহুৱা সভাও অনুষ্ঠিত হয়। এই সভাত বিশ্ববিদ্যালয়খনৰ শৈক্ষিক আৰু উন্নয়নমূলক অগ্ৰাধিকাৰসমূহৰ বিষয়ে আলোচনা কৰা হয়।
লগতে পঢ়ক: প্ৰতিখন জিলাতে স্থাপন হ’ব এখনকৈ মেডিকেল কলেজঃ মুখ্যমন্ত্ৰী
