ৰে’ল পৰিবহণত অসমৰ নতুন অধ্যায়, ১০০% বৈদ্যুতীকৰণ সম্পূৰ্ণ
ৰাজ্যখনৰ ৰেল সংযোগক লৈ এটা ভাল খবৰ শ্বেয়াৰ কৰিছে মুখ্যমন্ত্ৰী ড০ হিমন্ত বিশ্ব শৰ্মাই। অসমৰ ৰে’ল নেটৱৰ্কৰ ১০০ শতাংশ বৈদ্যুতীকৰণ সম্পূৰ্ণ হৈছে বুলি ১৪ ছেপ্টেম্বৰত মুখ্যমন্ত্ৰী হিমন্ত বিশ্ব শৰ্মাই জানিবলৈ দিয়ে। ইয়াক ৰাজ্যখনৰ বাবে এক “বৃহৎ মাইলষ্টোন” বুলি অভিহিত কৰে তেওঁ (Assam railway electrification)।
মুখ্যমন্ত্ৰী ড০ শৰ্মাই কয় যে এই সফলতাৰ ফলত অসমৰ সমগ্ৰ ৰে’ল নেটৱৰ্কত এতিয়াৰে পৰা বৈদ্যুতিক ট্ৰেকচনৰ জৰিয়তে ৰে’ল চলাব পৰা যাব। ইয়াৰ ফলত ৰাজ্যখনত ৰে’ল পৰিবহণ অধিক পৰিৱেশ-অনুকূল হ’ব (Assam railway network)।
ছ’চিয়েল মিডিয়া প্লেটফৰ্ম X-ত মুখ্যমন্ত্ৰীগৰাকীয়ে কয় যে বিগত ১২ বছৰত এই লক্ষ্যত উপনীত হৈছে চৰকাৰ। তেওঁ লগতে উল্লেখ কৰে যে ২০১৪ চনৰ পূৰ্বে অসমৰ বহু অঞ্চলতে ব্ৰডগজ ৰে’ল সংযোগো নাছিল (electric trains Assam)।
অসমৰ ৰে’ল আন্তঃগাঁথনি দেশৰ আন ৰাজ্যসমূহৰ সমকক্ষ কৰি তোলাৰ ক্ষেত্ৰত প্ৰধানমন্ত্ৰী নৰেন্দ্ৰ মোদীৰ প্ৰচেষ্টাক তেওঁ কৃতিত্ব দিয়ে। লগতে কেন্দ্ৰীয় ৰে’ল মন্ত্ৰী অশ্বিনী বৈষ্ণৱ আৰু প্ৰাক্তন ৰে’ল মন্ত্ৰী পীয়ূষ গোৱেল আৰু সুৰেশ প্ৰভুৰ অৱদানৰ কথাও স্বীকাৰ কৰে।
মুখ্যমন্ত্ৰী ড০ শৰ্মাই কয়, “মাননীয় প্ৰধানমন্ত্ৰী শ্ৰী নৰেন্দ্ৰ মোদীজীৰ অসমৰ ৰে’ল আন্তঃগাঁথনি দেশৰ আন ৰাজ্যসমূহৰ সমপৰ্যায়লৈ অনাৰ অক্লান্ত প্ৰচেষ্টাৰ বাবেই এয়া সম্ভৱ হৈছে।”
ৰে’ল বৈদ্যুতীকৰণ অভিযান সম্পূৰ্ণ কৰাত নেতৃত্ব দিয়াৰ বাবে তেওঁ অশ্বিনী বৈষ্ণৱক ধন্যবাদ জনায়। লগতে ২০১৪ চনৰ পৰা বিভিন্ন পৰ্যায়ত এই উদ্যোগ আগুৱাই নিয়াৰ বাবে পীয়ূষ গোৱেল আৰু সুৰেশ প্ৰভুৰ অৱদানৰ কথাও উল্লেখ কৰে।
লগতে পঢ়ক: ব্ৰিকছ সন্মিলনৰ সফলতাক লৈ মোদীক প্ৰশংসা হিমন্ত বিশ্ব শৰ্মাৰ
