যোৰহাট বিমান ঘাটিত শনিবাৰে সংঘটিত হোৱা বিমান দুৰ্ঘটনাক লৈ শোক প্ৰকাশ কৰিছে মুখ্যমন্ত্ৰী হিমন্ত বিশ্ব শৰ্মাই । এই দুৰ্ঘটনাত ভাৰতীয় বায়ু সেনাৰ পাঁচগৰাকীকৈ জোৱানে শ্বহীদ বৰণ কৰে ।
যোৰহাট বিমান ঘাটীত শনিবাৰে ভাৰতীয় বায়ু সেনাৰ এক AN-32 সামৰিক পৰিবহন বিমান দুৰ্ঘটনাত পতিত হয় । এই দুৰ্ভাগ্যজনক ঘটনাত ভাৰতীয় বিমান বাহিনীৰ পাঁচগৰাকীকৈ বীৰ জোৱানে কৰ্তব্যৰত অৱস্থাত প্ৰাণ হেৰুৱায় । মৃত জোৱানকেইগৰাকী হৈছে- স্কোৱাড্ৰন লিডাৰ প্ৰশান্ত সিং, ফ্লাইট লেফটিনেণ্ট শুভম কুমাৰ, চাৰ্জেণ্ট জিতেন্দ্ৰ শৰ্মা, অগ্নিবীৰবায়ু খেমাৰাম কুমাৱত আৰু অগ্নিবীৰবায়ু দানিছ আলম ।
মুখ্যমন্ত্ৰী হিমন্ত বিশ্ব শৰ্মাৰ শোকবাৰ্তা-
এই মৰ্মান্তিক ঘটনাক লৈ গভীৰ শোক প্ৰকাশ কৰিছে অসমৰ মুখ্যমন্ত্ৰী ড° হিমন্ত বিশ্ব শৰ্মাই । সামাজিক মাধ্যম ‘এক্স’ত (পূৰ্বৰ টুইটাৰ) কৰা এটা পোষ্টত তেওঁ কয় :
“যোৰহাটত সংঘটিত এএন-৩২ বিমান দুৰ্ঘটনাত ভাৰতীয় বিমান বাহিনীৰ ৫ গৰাকী বীৰ জোৱানক হেৰুৱাই মই অতিকৈ দুখ পাইছোঁ । কৰ্তব্যৰত অৱস্থাত স্কোৱাড্ৰন লিডাৰ প্ৰশান্ত সিং, ফ্লাইট লেফটিনেণ্ট শুভম কুমাৰ, চাৰ্জেণ্ট জিতেন্দ্ৰ শৰ্মা, অগ্নিবীৰবায়ু খেমাৰাম কুমাৱত আৰু অগ্নিবীৰবায়ু দানিছ আলমৰ এই বিয়োগ অত্যন্ত দুৰ্ভাগ্যজনক । অসমবাসীৰ হৈ মই শোকসন্তপ্ত পৰিয়ালবৰ্গলৈ মোৰ সমবেদনা আৰু প্ৰাৰ্থনা জ্ঞাপন কৰিলোঁ ।”
মুখ্যমন্ত্ৰীগৰাকীয়ে লগতে উল্লেখ কৰে যে অসম চৰকাৰ এই সন্দৰ্ভত সংশ্লিষ্ট কৰ্তৃপক্ষৰ সৈতে অহৰহ যোগাযোগত আছে আৰু যিকোনো ধৰণৰ সহযোগ তথা প্ৰয়োজনীয় সহায় আগবঢ়াবলৈ সম্পূৰ্ণ সাজু হৈ আছে ।
পুৰণি বিমান সলনিৰ প্ৰক্ৰিয়া ক্ষিপ্ৰ কৰাৰ চিন্তা-
উল্লেখ্য যে, এএন-৩২ হৈছে এখন টুইন ইঞ্জিনযুক্ত সামৰিক পৰিবহন বিমান । ভাৰতীয় বিমান বাহিনীয়ে দীৰ্ঘদিন ধৰি দেশৰ দুর্গম তথা উচ্চ-উচ্চতাৰ অঞ্চলসমূহত লজিষ্টিক, সামগ্ৰী পৰিবহন আৰু কাৰ্যক্ষম সহায়ক অভিযানৰ বাবে এই বিমানসমূহ ব্যৱহাৰ কৰি আহিছে ।
প্ৰতিৰক্ষা মন্ত্ৰালয়ে প্ৰকাশ কৰা অনুসৰি, ভৱিষ্যতৰ কৌশলগত আৰু কাৰ্যক্ষম এয়াৰলিফ্টৰ প্ৰয়োজনীয়তা পূৰণ কৰিবলৈ বিমান বাহিনীয়ে এতিয়া তেওঁলোকৰ পুৰণি হৈ অহা এএন-৩২ আৰু আইএল-৭৬ পৰিবহন বিমানসমূহ ‘মজলীয়া পৰিবহন বিমান’ কাৰ্যসূচীৰ অধীনত নতুন বিমানেৰে সলনি কৰাৰ পৰিকল্পনা যুগুত কৰিছে ।
লগতে পঢ়ক : যোৰহাটৰ বিমান দুৰ্ঘটনাত দেশে হেৰুৱালে ৫ গৰাকী জোৱান, তদন্তৰ নিৰ্দেশ
