বানৰ ভয়াৱহ ৰূপ: অসমত ৪৭ লৈ বৃদ্ধি মৃতকৰ সংখ্যা, প্ৰভাৱিত ৬ লাখতকৈয়ো অধিক লোক
ৰাজ্যত অব্যাহত থকা প্ৰলয়ংকাৰী বানত পৰিস্থিতি ক্ৰমান্বয়ে অধিক শোচনীয় হৈ পৰিছে । অসম ৰাজ্যিক দুৰ্যোগ ব্যৱস্থাপনা প্ৰাধিকৰণ-এ জাৰি কৰা শেহতীয়া প্ৰতিবেদন অনুসৰি, ৰাজ্যখনত আন ৬ গৰাকী লোকে প্ৰাণ হৰুৱাৰ পাছত চলিত বানত মৃতকৰ সংখ্যা ৪৭ জনলৈ বৃদ্ধি পাইছে ।
বিগত ২৪ ঘণ্টাত ১০ জনৰ মৃত্যু
ASDMA-ৰ প্ৰতিবেদন মতে, বৃহস্পতিবাৰে কেৱল ২৪ ঘণ্টাত ৪ টা শিশুকে ধৰি ১০ গৰাকী লোকৰ সলিল সমাধি ঘটে ।
জিলা অনুসৰি মৃতকৰ সংখ্যা:
শিৱসাগৰ: ৩ জন
যোৰহাট: ৩ জন
চৰাইদেউ: ২ জন
ধেমাজি: ১ জন
কাৰ্বি আংলং: ১ জন
প্ৰাধিকৰণে প্ৰকাশ কৰা তথ্য মতে, তিনিগৰাকী পুৰুষ আৰু তিনিগৰাকী মহিলাসহ মুঠ ৬ গৰাকী ব্যক্তি এতিয়াও নিখোঁজ হৈ আছে ।
প্ৰভাৱিত জিলা আৰু গাঁৱৰ পৰিসংখ্যা
ৰাজ্যৰ ১১ খন জিলাৰ ৬.৫৩ লাখৰো অধিক লোক এই বানৰ কৱলত পৰিছে । ৪০ টা ৰাজহ চক্ৰৰ অন্তৰ্গত মুঠ ৯৩৯ খন গাঁও সম্পূৰ্ণৰূপে পানীৰ তলত ।
আটাইতকৈ বেছি ক্ষতিগ্ৰস্ত জিলাসমূহ-
শিৱসাগৰ– ৩,৯২,১৯৫
চৰাইদেউ- ১,১০,৭৫৫
যোৰহাট- ৯৭,৬৯০
গোলাঘাট- ২৫,৫৯১
ডিব্ৰুগড়- ১৩,৩৯০
ইয়াৰ উপৰিও কাৰ্বি আংলং, কামৰূপ, নগাঁও, ধেমাজি, হোজাই আৰু কামৰূপ (মহানগৰ) জিলাতো বানৰ ব্যাপক প্ৰভাৱ পৰিছে ।
নাগালেণ্ডৰ ডাৱৰ বিস্ফোৰণেই ঘাই কাৰণ: মুখ্যমন্ত্ৰী
পৰিস্থিতিৰ বুজ ল’বলৈ মুখ্যমন্ত্ৰী ড° হিমন্ত বিশ্ব শৰ্মাই বৃহস্পতিবাৰে দেৰগাঁৱৰ এটা সাহায্য শিবিৰ পৰিদৰ্শন কৰে । পৰিস্থিতিক “গম্ভীৰ” বুলি আখ্যা দি তেওঁ কয় যে মৃতকৰ সংখ্যা আৰু বৃদ্ধি পোৱাৰ সম্ভাৱনা আছে ।
তেওঁ কয়- “নাগালেণ্ডত হোৱা ডাৱৰ বিস্ফোৰণৰ বাবেই এই গোটেই পৰিস্থিতিটোৰ সৃষ্টি হৈছে । চুবুৰীয়া ৰাজ্যখনৰ ওপৰৰ অংশৰ পৰা অহা পানীয়ে আমাৰ চাৰিখন জিলা গুৰুতৰভাৱে প্ৰভাৱিত কৰিছে ।”
ইফালে ৰাজ্যজুৰি অবিৰাম বৰষুণ অব্যাহত থকাৰ বাবে মহাবাহু ব্ৰহ্মপুত্ৰৰ লগতে ইয়াৰ কেইবাখনো মূল উপনৈৰ পানীৰ স্তৰ ভিন্ন স্থানত বিপদসীমাৰ ওপৰেৰে প্ৰবাহিত হৈ আছে, যিয়ে সংকট আৰু অধিক ঘনীভূত কৰি তুলিছে ।
লগতে পঢ়ক : বান পৰিস্থিতিৰ জৰুৰী পৰ্যালোচনা: যুদ্ধকালীন ক্ষিপ্ৰতাৰে পুনৰসংস্থাপনৰ নিৰ্দেশ মুখ্যমন্ত্ৰীৰ
