উজনি অসমৰ ভয়াৱহ বান পৰিস্থিতিক লৈ মুখ্যমন্ত্ৰী ড০ হিমন্ত বিশ্ব শৰ্মাই ডাঙৰ মন্তব্য কৰিছে। তেওঁ কয় যে ১৮ জুলাইৰ পৰা ১৯ জুলাইৰ ভিতৰত নাগালেণ্ডৰ মন, মোকোকচুং আৰু ওখা জিলাৰ লগতে অসমৰ চৰাইদেউ জিলাত ৪৩৫-৪৯৩ শতাংশ অতিৰিক্ত বৰষুণ হৈছিল।
মুখ্যমন্ত্ৰী ড০ হিমন্ত বিশ্ব শৰ্মাই ২৪ জুলাইত কয় যে উজনি অসমৰ বান পৰিস্থিতি অত্যন্ত “ভয়াৱহ” হৈয়েই আছে। তেওঁ সতৰ্ক কৰি দিয়ে যে মৃতকৰ সংখ্যা আৰু বৃদ্ধি পোৱাৰ সম্ভাৱনা আছে, কাৰণ আটাইতকৈ বেছিকৈ প্ৰভাৱিত হোৱা অঞ্চলসমূহৰ প্ৰায় ২০-২৫ শতাংশ স্থানত এতিয়াও উদ্ধাৰকাৰী দল উপস্থিত হ’ব পৰা নাই।
সংবাদ মাধ্যমক সম্বোধন কৰি মুখ্যমন্ত্ৰী গৰাকীয়ে কয় যে অসম আৰু চুবুৰীয়া নাগালেণ্ডত হোৱা নেৰানেপেৰা বৰষুণৰ বাবে অহা আকস্মিক বানে শিৱসাগৰ আৰু চৰাইদেউ জিলা ধ্বংস কৰি পেলাইছে। ৰাজ্যখনৰ এই কেইটা অঞ্চল সাধাৰণ বানপানীৰ পৰিধিৰ বাহিৰত আছিল।
তেওঁ কয় যে ১৮ জুলাইৰ পৰা ১৯ জুলাইৰ ভিতৰত নাগালেণ্ডৰ মন, মোকোকচুং আৰু ওখা জিলাৰ লগতে অসমৰ চৰাইদেউ জিলাত ৪৩৫-৪৯৩ শতাংশ অতিৰিক্ত বৰষুণ হৈছিল।
“পৰিস্থিতি অত্যন্ত কৰুণ আৰু বিপদজনক। এই জিলাসমূহত পূৰ্বে কেতিয়াও এনে বৰষুণ দেখা পোৱা নাছিল। সাধাৰণতে এইবোৰ জিলা বানপানীৰ পৰা মুক্ত হৈ থাকে, কিন্তু এইবাৰ ইয়াত অভূতপূৰ্ব তাণ্ডৱ লীলা চলিল,” বুলিও মুখ্যমন্ত্ৰীগৰাকীয়ে কয়।
মুখ্যমন্ত্ৰী গৰাকীৰ মতে, চৰাইদেউত ১০ জন আৰু শিৱসাগৰত ২১ জন লোকৰ মৃত্যু নিশ্চিত কৰা হৈছে, যাৰ ফলত দুয়োখন জিলাত সৰ্বমুঠ মৃত্যুৰ সংখ্যা ৪৭ লৈ বৃদ্ধি পাইছে। সাতজন লোক আনুষ্ঠানিকভাৱে নিৰুদ্দেশ হৈ আছে। মৃতকৰ সংখ্যা ইয়াতকৈ বেছি হ’ব পাৰে কাৰণ বহু গাঁও এতিয়াও যোগাযোগহীন হৈ আছে।
দুয়োখন জিলা মিলি প্ৰায় সাত লাখ লোক প্ৰভাৱিত হৈছে আৰু বিশাল অঞ্চল এতিয়াও পানীৰ তলত বুৰ গৈ আছে।
মুখ্যমন্ত্ৰীগৰাকীয়ে জনায় যে চৰকাৰে সেনা, ভাৰতীয় বায়ু সেনা, ৰাষ্ট্ৰীয় দুৰ্যোগ প্ৰশমন বাহিনী (NDRF) আৰু ৰাজ্যিক সংস্থাসমূহৰ সহায়ত অহৰহ উদ্ধাৰ আৰু সাহায্য অভিযান চলাই আছে। প্ৰভাৱিত জিলাসমূহত দুগৰাকী মন্ত্ৰীয়ে বাহৰ লৈ থকাৰ লগতে ৰাজহ মন্ত্ৰী কেশৱ মহন্তকো সাহায্য কাৰ্যসূচী তদাৰক কৰিবলৈ দায়িত্ব দিয়া হৈছে।
এই প্ৰচেষ্টা সত্ত্বেও, মুখ্যমন্ত্ৰী গৰাকীয়ে স্বীকাৰ কৰে যে বাট-পথ উটুৱাই নিয়া আৰু যোগাযোগ ব্যৱস্থা ব্যাহত হোৱাৰ বাবে চৰাইদেউ জিলাৰ প্ৰায় ২০ শতাংশ অঞ্চল এতিয়াও দুৰ্গম হৈ আছে।
“আমি প্ৰতিজন প্ৰভাৱিত ব্যক্তিৰ ওচৰ পোৱাৰ চেষ্টা অব্যাহত ৰাখিছো, কিন্তু বহু স্থান এতিয়াও বিছিন্ন হৈ আছে,” বুলিও মুখ্যমন্ত্ৰী গৰাকীয়ে কয়।
শৰ্মাই এই কথাও নিশ্চিত কৰে যে কেন্দ্ৰীয় গৃহমন্ত্ৰী অমিত শ্বাহে তেওঁৰ সৈতে কথা পাতিছে আৰু জনাইছে যে বানৰ ক্ষয়-ক্ষতিৰ পৰ্যালোচনা কৰিবলৈ ২৫ জুলাইত এক আন্তঃমন্ত্রণালয়ৰ কেন্দ্ৰীয় দল অসম ভ্ৰমণত আহিব।
নৈৰ পানী উপচি পৰাৰ ফলত হোৱা বানপানীতকৈ এই দুৰ্যোগ সুকীয়া বুলি বৰ্ণনা কৰি মুখ্যমন্ত্ৰীগৰাকীয়ে কয় যে প্ৰচণ্ড বৰষুণৰ ফলত মাত্ৰ কেইঘণ্টামানৰ ভিতৰতে এই ভয়ংকৰ ৰূপ ধাৰণ কৰিলে।
তেওঁ কয় “সাধাৰণতে নদীৰ পানী লাহে লাহে বৃদ্ধি পোৱাৰ বাবে আমি বানপানীৰ পূৰ্বাভাস পাব পাৰো। কিন্তু এইবাৰ, ১৮ জুলাইৰ বিয়লি প্ৰায় ৩ বজাত বৰষুণ আৰম্ভ হৈছিল আৰু সন্ধিয়া ৭ বজাৰ ভিতৰতে ব্যাপক ধ্বংসলীলা সংঘটিত হৈছিল”।
এই ঘটনাটো বৈজ্ঞানিকভাৱে ‘ডাৱৰ বিস্ফোৰণ’ (cloudburst) হিচাপে শ্ৰেণীভুক্ত কৰিব পৰা যায়নে বুলি সোধা এক প্ৰশ্নৰ উত্তৰত তেওঁ কয় যে এই বিষয়টো বিশেষজ্ঞসকলে নিৰ্ধাৰণ কৰিবলৈ এৰা হৈছে, কিন্তু প্ৰশাসনিক দৃষ্টিকোণৰ পৰা স্বাভাৱিকতকৈ প্ৰায় ৫০০ শতাংশ বেছি বৰষুণ হোৱাৰ প্ৰভাৱ ডাৱৰ বিস্ফোৰণৰ দৰেই।
লগতে পঢ়ক: ‘শিৱসাগৰ, নাজিৰাৰ প্ৰায় ৮০ হাজাৰ বানাক্ৰান্তৰ ওচৰলৈ চৰকাৰ যাব পৰা নাই’; মুখ্যমন্ত্ৰী
