কাইলৈৰ পৰা আৰম্ভ হ’ব অসম প্ৰিমিয়াৰ লীগ। পোনপটীয়া সম্প্ৰচাৰৰ বাণিজ্যিক চুক্তি উলংঘন কৰিব নোৱাৰাৰ বাবেই বান পৰিস্থিতিৰ মাজতেই এ পি এলৰ আয়োজনৰ কৰা হৈছে।
অসম প্ৰিমিয়াৰ লীগ (APL) পূর্ব নির্ধাৰিত সূচী অনুসৰি ১ আগষ্টৰ পৰা আৰম্ভ হ’ব। উজনি অসমৰ ৪ খনকৈ জিলাক শেহতীয়া বান পৰিস্থিতিৰ পৰা উদ্ধাৰৰ চেষ্টা চলাই থকাৰ মাজতে এই প্ৰতিযোগিতাখন ২৩ আগষ্টলৈকে চলি থাকিব। পোনপটীয়া সম্প্ৰচাৰৰ বাণিজ্যিক চুক্তি উলংঘন কৰিব নোৱাৰাৰ বাবেই বান পৰিস্থিতিৰ মাজতেই অসম ক্ৰিকেট সন্থাই এ পি এলৰ আয়োজনৰ কৰিছে।
ভাৰতীয় ক্ৰিকেট নিয়ন্ত্ৰণ ব’ৰ্ড (BCCI)ৰ যুটীয়া সম্পাদক দেৱজিৎ লন শইকীয়াই এই অসম প্ৰিমিয়াৰ লীগৰ সকলো প্ৰস্তুতি সম্পূৰ্ণ কৰাৰ বাবে অসম ক্ৰিকেট সন্থা (ACA)ক অভিনন্দন জনায়। কিন্তু, ৰাজ্যখনৰ বৰ্তমানৰ অৱস্থাৰ প্ৰতি লক্ষ্য ৰাখি আয়োজকসকলক কোনো জাকজমকীয়া উদ্বোধনী অনুষ্ঠান বা মনোৰঞ্জনধৰ্মী কাৰ্যসূচী আয়োজন নকৰিবলৈ অনুৰোধ জনায়।
তেওঁ কয়, “কাইলৈৰ পৰা অসম প্ৰিমিয়াৰ লীগ আৰম্ভ কৰাৰ বাবে সুন্দৰ ব্যৱস্থা গ্ৰহণ কৰা অসম ক্ৰিকেট সন্থাক মই অভিনন্দন জনাইছোঁ। মোৰ একমাত্ৰ অনুৰোধ যে ACA-এ এই প্ৰতিযোগিতাখনৰ উদ্ধোধনী অনুষ্ঠানটো অতি জাকজমকীয়াভাৱে অনুষ্ঠিত কৰিব নালাগে, কাৰণ অসমৰ বৰ্তমানৰ পৰিস্থিতি মনোৰঞ্জনধৰ্মী কাৰ্যসূচী আয়োজনৰ বাবে অনুকূল নহয়।”
তেওঁ কয় যে প্ৰতিযোগিতাখন পিছুৱাই দিয়াটো কঠিন হ’ব, কাৰণ সকলো প্ৰস্তুতি ইতিমধ্যে সম্পূৰ্ণ হৈছে আৰু ২৩ আগষ্টৰ পিছত ACA-ৰ হাতত প্ৰতিযোগিতাখন পুনৰ নিৰ্ধাৰণ কৰাৰ বাবে কোনো উপযুক্ত সময় নাই।
“যদি আমি কাইলৈৰ পৰা ২৩ আগষ্টলৈকে এই প্ৰতিযোগিতাখন অনুষ্ঠিত নকৰোঁ, তেন্তে পৰৱৰ্তী আঠ মাহৰ বাবে কোনো সময় খালী নাথাকিব” বুলিও শইকীয়াই কয়। তেওঁ লগতে জনায় যে এই প্ৰতিযোগিতাৰ পিছতেই ঘৰুৱা ক্ৰিকেট বৰ্ষ আৰম্ভ হ’ব আৰু ইণ্ডিয়ান প্ৰিমিয়াৰ লীগ (IPL)ৰ সৈতে ২০২৭ চনৰ মে’ মাহলৈকে চলি থাকিব।
তেওঁ অসমৰ বানপীড়িত ৰাইজক সহায়ৰ হাত বঢ়োৱাৰ বাবে ACA-ৰ প্ৰশংসা কৰে আৰু উল্লেখ কৰে যে সন্থাই ২৪ জুলাইত সাহায্য পুঁজিৰ বাবে ৫০ লাখ টকা দান কৰিছিল।
