জীৱনজোৰা সঞ্চয়ৰ ১ কোটি টকা বিশ্ববিদ্যালয়ক দান কৰিলে আদৰ্শ অধ্যাপক দম্পতীয়ে
উদাৰতা আৰু সমাজসেৱাৰ এক অনন্য নিদৰ্শন দাঙি ধৰিছে ৰাজ্যৰ এক অৱসৰপ্ৰাপ্ত শিক্ষাবিদ দম্পতীয়ে । কটন কলেজৰ অৱসৰপ্ৰাপ্ত অধ্যাপক ড০ পান্নালাল গোস্বামী আৰু তেওঁৰ সহধৰ্মিণী ড° নন্দিতা ভট্টাচাৰ্য গোস্বামীয়ে নিজৰ জীৱনজোৰা সঞ্চয়ৰ ১ কোটি টকা ‘কুমাৰ ভাস্কৰ বাৰ্মা সংস্কৃত আৰু পুৰাতন অধ্যয়ন বিশ্ববিদ্যালয়’ক দান কৰি এক বিৰল আদৰ্শ স্থাপন কৰিছে ।
বছৰ বছৰ ধৰি কঠোৰ পৰিশ্ৰমেৰে অৰ্জন কৰা এই বৃহৎ ধনৰাশি জনসাধাৰণৰ কল্যাণৰ বাবে ত্যাগ কৰি দম্পতীটোৱে কয় যে ধন-সম্পদৰ প্ৰকৃত মূল্য সমাজক কিবা এটা ওভতাই দিয়াৰ মাজতহে নিহিত থাকে । ড° নন্দিতা ভট্টাচাৰ্য গোস্বামীয়ে অত্যন্ত বিনম্ৰতাৰে কয়- “পইচাটো আমাৰ বাবে এক বোজা হৈ পৰিছিল । ৰাইজৰ সম্পত্তি ৰাইজক ওভতাই দি আমি কেৱল সেই বোজাহে লাঘৱ কৰিছোঁ ।” তেওঁলোকে সদায় “সৰল জীৱন, উচ্চ চিন্তা”ৰ আদৰ্শক সাৰোগত কৰিয়েই এই সিদ্ধান্ত গ্ৰহণ কৰা বুলি জানিবলৈ দিয়ে ।
উল্লেখযোগ্য যে, এই মহান দানৰ জৰিয়তে দম্পতীটোৱে কেৱল সততা আৰু সামাজিক দায়িত্ববোধৰে পৰিচয় দিয়া নাই, বৰঞ্চ ভৱিষ্যত প্ৰজন্মৰ বাবেও শিক্ষা আৰু সফলতাক বৃহত্তৰ সমাজৰ স্বাৰ্থত ব্যৱহাৰ কৰাৰ এক সুন্দৰ অনুপ্ৰেৰণা দি গৈছে ।
আনহাতে, এই বিশেষ ক্ষণত ড° পান্নালাল গোস্বামীয়ে তেওঁৰ প্ৰাক্তন ছাত্ৰ তথা অসমৰ বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাক লৈও গৌৰৱ প্ৰকাশ কৰে । এই বিশিষ্ট শিক্ষাবিদ দম্পতীৰ ব্যতিক্ৰমী পদক্ষেপে পুনৰবাৰ প্ৰমাণ কৰিলে যে- জীৱনৰ আটাইতকৈ ডাঙৰ ঐতিহ্য বা উত্তৰাধিকাৰ এজন মানুহে কৰা সম্পত্তিৰ সঞ্চয় নহয়, বৰঞ্চ সমাজলৈ আগবঢ়োৱা নিস্বাৰ্থ বৰঙণিহে ।
লগতে পঢ়ক : লোকপিয়লত জড়িত বিষয়া-কর্মচাৰীলৈ GMCৰ কঠোৰ নিৰ্দেশনা
