তিনিচুকীয়াৰ চোটা টিংৰাই চাহ বাগিচাত অসমে ব্যৱসায়িকভাৱে মাচ্চা চাহ উৎপাদন আৰম্ভ কৰিছে। ভাৰত-জাপান সহযোগিতাৰ সমৰ্থিত এই পদক্ষেপৰ লক্ষ্য হৈছে অসমৰ বিশ্বব্যাপী চাহৰ পদাংক সম্প্ৰসাৰণ।
অসমৰ চাহ উদ্যোগৰ বাবে এক ঐতিহাসিক ক্ষণ । সমগ্ৰ ভাৰতৰ ভিতৰতে প্ৰথমবাৰৰ বাবে অসমত বাণিজ্যিকভাৱে উৎপাদন আৰম্ভ হৈছে বিশ্বজুৰি জনপ্ৰিয় মাচ্চা চাহ (Matcha Tea) । তিনিচুকীয়া জিলাৰ বিখ্যাত ছোটো টিংৰাই চাহ বাগিচাত এই উৎপাদন সফলতাৰে আৰম্ভ কৰা হৈছে । শুকুৰবাৰে মুখ্যমন্ত্ৰী ড০ হিমন্ত বিশ্ব শৰ্মাই ছচিয়েল মিডিয়া প্লেটফৰ্ম এক্স যোগে এই গুৰুত্বপূৰ্ণ ঘোষণা কৰে ।
মুখ্যমন্ত্ৰীগৰাকীয়ে উল্লেখ কৰে যে এই সাফল্যই অসমৰ চহকী চাহ ঐতিহ্যক অধিক শক্তিশালী কৰাৰ লগতে ৰাজ্যখনৰ চাহ উদ্যোগলৈ এক নতুন মাত্ৰা কঢ়িয়াই আনিব ।
ভাৰত-জাপানৰ ১০ বছৰীয়া যৌথ প্ৰচেষ্টাৰ ফল
মুখ্যমন্ত্ৰী ড০ হিমন্ত বিশ্ব শৰ্মাই জনোৱা মতে, এই ঐতিহাসিক মাইলৰ খুঁটি সহজে সম্ভৱ হোৱা নাই । ইয়াৰ আঁহত আছে ভাৰত আৰু জাপানৰ সুদৃঢ় সম্পৰ্ক । বিগত এটা দশক ধৰি চলা এক যৌথ সহযোগিতাৰ ফলস্বৰূপে জাপানী প্ৰযুক্তি, মেট্চা উৎপাদনৰ বিশেষ কৌশল আৰু অত্যাধুনিক যন্ত্ৰপাতি অসমৰ চাহ খণ্ডলৈ অনা হৈছে । ইয়াৰ ফলতেই অসম আজি দেশৰ প্ৰথম মেট্চা চাহ উৎপাদনকাৰী ৰাজ্য হিচাপে পৰিগণিত হ’বলৈ সক্ষম হৈছে ।
“আপোনাৰ প্ৰিয় মাচ্চা চাহ এতিয়া অসমতে উৎপাদন হ’ব । তিনিচুকীয়াৰ চোটা টিংৰাই চাহ বাগিচাত বাণিজ্যিকভাৱে মেট্চা চাহ উৎপাদন কৰা অসম ভাৰতৰ প্ৰথমখন ৰাজ্য হৈ পৰিছে ।” – মুখ্যমন্ত্ৰী হিমন্ত বিশ্ব শৰ্মা
প্ৰথম লটতে অভিলেখ দৰ: গুৱাহাটী চাহ নিলাম কেন্দ্ৰত বিক্ৰী
অসমত উৎপাদিত এই প্ৰিমিয়াম কোৱালিটীৰ মেট্চা চাহে বজাৰত প্ৰৱেশ কৰিয়েই চমক সৃষ্টি কৰিবলৈ সক্ষম হৈছে । মুখ্যমন্ত্ৰীৰ তথ্য অনুসৰি, বাণিজ্যিকভাৱে উৎপাদিত এই মাচ্চা চাহৰ প্ৰথমটো লট গুৱাহাটী চাহ নিলাম কেন্দ্ৰত প্ৰতি কেজি ১৩,০০০ টকাত বিক্ৰী হয় । এই দামে স্পষ্ট কৰি দিছে যে ঘৰুৱা আৰু আন্তঃৰাষ্ট্ৰীয় বজাৰত অসমৰ মেট্চা চাহৰ চাহিদা অত্যন্ত আশাপ্ৰদ হ’ব ।
বিশ্ব বজাৰত জিলিকিব ‘অসম চাহ’ ব্ৰেণ্ড
সাম্প্ৰতিক সময়ত বিশ্বজুৰি স্বাস্থ্য সচেতন লোকসকলৰ মাজত মাচ্চা গ্ৰীন টিৰ জনপ্ৰিয়তা আকাশলংঘী । মুখ্যমন্ত্ৰী শৰ্মাই কয় যে এই বৈচিত্ৰ্যকৰণে আন্তঃৰাষ্ট্ৰীয় বজাৰত ‘অসম চাহ’ ব্ৰেণ্ডটোক নতুনকৈ প্ৰতিষ্ঠা কৰাত সহায় কৰিব ।
ইয়াক ভাৰত-জাপান সহযোগিতাৰ এক “অভূতপূৰ্ব সফলতা” বুলি অভিহিত কৰি তেওঁ আশা প্ৰকাশ কৰে যে এই নতুন উদ্যোগে অসমৰ চাহ উৎপাদকসকলৰ বাবে সংস্থাপন আৰু উপাৰ্জনৰ নতুন সুযোগৰ সৃষ্টি কৰিব ।
লগতে পঢ়ক: অসমত মেগা বৃক্ষৰোপণৰ প্ৰস্তুতি: ১৪ আগষ্টৰ ভিতৰত ১ কোটি পুলি ৰোপণ কৰিব বন বিভাগে
