ফুটবলপ্ৰেমীলৈ মুখ্যমন্ত্ৰীৰ উপহাৰ! বিশ্বকাপৰ মেচৰ বাবে পুৱতি নিশা ৩:৩০ বজালৈ খোলা থাকিব ৰেষ্টুৰেণ্ট
ৰাজ্যৰ ফুটবল অনুৰাগীসকলৰ বাবে এক অতি ভাল খবৰ । চলিত ফিফা বিশ্বকাপৰ তীব্ৰ উত্তেজনাপূৰ্ণ ছেমি-ফাইনেল আৰু ফাইনেল মেচ ৰাইজে যাতে কোনো অসুবিধা নোহোৱাকৈ একেলগে বহি উপভোগ কৰিব পাৰে, তাৰ বাবে এক ডাঙৰ সিদ্ধান্ত গ্ৰহণ কৰিছে ৰাজ্য চৰকাৰে । অসমৰ মুখ্যমন্ত্ৰী ড° হিমন্ত বিশ্ব শৰ্মাই গুৱাহাটী জিলা প্ৰশাসনক অহা ১৫, ১৬, ১৯ আৰু ২০ জুলাইৰ নিশা চহৰখনৰ ৰেষ্টুৰেণ্টসমূহ খোলা ৰখাৰ সময় পুৱা ৩:৩০ বজালৈ বৃদ্ধি কৰাৰ বিশেষ অনুমতি প্ৰদান কৰিছে ।
এক্স-যোগে মুখ্যমন্ত্ৰীগৰাকীয়ে এই সুখবৰটো ভগাই লৈ কয়, “যিকোনো খেল উপভোগৰ আনন্দ একেলগে বহি চোৱাতেই আছে । আমি বিচাৰোঁ- আমাৰ ক্ৰীড়ানুৰাগী ফুটবলপ্ৰেমী ৰাইজে যাতে চলিত ফিফা বিশ্বকাপৰ ছেমিফাইনেল আৰু ফাইনেলৰ খেল কোনো অসুবিধা নোহোৱাকৈ উপভোগ কৰিব পাৰে ।” তেওঁ লগতে উল্লেখ কৰে যে ক্ৰীড়াসুলভ মানসিকতাই সমাজক এক কৰি ৰাখে আৰু ফুটবলৰ দৰে জনসমাদৃত ক্ৰীড়া এই দিশত সদায় অগ্ৰণী ।
ইফালে ফেচবুকতো মুখ্যমন্ত্ৰীগৰাকীয়ে এই সুখবৰ শ্বেয়াৰ কৰি লিখিছে- ‘ফুটবলপ্ৰেমী সকলৰ বাবে এটি সুখবৰ
যিকোনো খেল উপভোগৰ আনন্দ একেলগে বহি চোৱাতেই আছে । আমি বিচাৰোঁ-আমাৰ ক্ৰীড়ানুৰাগী ফুটবলপ্ৰেমী ৰাইজে যাতে চলিত ফিফা বিশ্বকাপৰ ছেমিফাইনেল আৰু ফাইনেলৰ খেলসমূহ কোনো অসুবিধা নোহোৱাকৈ উপভোগ কৰিব পাৰে ।
সেই উদ্দেশ্য আগত ৰাখিয়েই গুৱাহাটীত ১৫, ১৬, ১৯ আৰু ২০ জুলাইৰ নিশা ৰেষ্টুৰেণ্টসমূহ খুলি ৰখাৰ সময় পুৱা ৩:৩০ বজালৈ বঢ়াই দিয়াৰ বাবে জিলা প্ৰশাসনক অনুমতি প্ৰদান কৰা হৈছে ।‘
তেওঁ লগতে লিখিছে- ‘তদুপৰি কোনো জিলাত যদি ৰেষ্টুৰেণ্ট মালিক সন্থাৰ অনুৰোধ আৰু স্থানীয় জনসাধাৰণে বিচাৰে, সেইসমূহ জিলাৰ জিলা প্ৰশাসনকো একেধৰণৰ অনুমতি দিব পৰাকৈ অধিকাৰ প্রদান কৰা হৈছে ।
ক্রীড়াসুলভ মানসিকতাই সমাজক এক কৰি ৰাখে আৰু ফুটবলৰ দৰে জনসমাদৃত ক্রীড়া এই দিশত অগ্ৰণী । আমাৰ আহ্বান- সকলোৱে দায়িত্বশীলভাৱে সুন্দৰ খেলসমূহ উপভোগ কৰক আৰু ফুটবলৰ ৰোমাঞ্চকৰ অভিজ্ঞতা লওক ।‘
কেৱল গুৱাহাটীতেই নহয়, আন জিলাসমূহতো লাভ কৰিব পাৰিব এই সুবিধা: মুখ্যমন্ত্ৰী ড০ শৰ্মাই কেৱল গুৱাহাটীতেই সীমাৱদ্ধ নাৰাখি ৰাজ্যৰ আন আন জিলা প্ৰশাসনসমূহকো নিজ নিজ এলেকাত একেধৰণৰ সময়সীমা বৃদ্ধিৰ অনুমতি দিয়াৰ সম্পূৰ্ণ অধিকাৰ প্ৰদান কৰিছে । অৱশ্যে ইয়াৰ বাবে সংশ্লিষ্ট জিলাৰ ‘ৰেষ্টুৰেণ্ট মালিক সন্থা’ই আবেদন কৰিব লাগিব আৰু স্থানীয় ৰাইজৰ মাজত ইয়াৰ পৰ্যাপ্ত চাহিদা থাকিব লাগিব ।
আনহাতে, ফুটবলৰ এই মহাৰণক লৈ সকলো উৎসাহিত হৈ থকাৰ মাজতে মুখ্যমন্ত্ৰীগৰাকীয়ে অনুৰাগীসকলক এক বিশেষ আহ্বান জনাইছে । তেওঁ সকলোকে এই বৰ্ধিত সময়ছোৱাৰ সুযোগ গ্ৰহণ কৰাৰ লগতে অতি দায়িত্বশীলভাৱে সুন্দৰকৈ খেলসমূহ উপভোগ কৰি ফুটবলৰ ৰোমাঞ্চকৰ অভিজ্ঞতা লাভ কৰিবলৈ অনুৰোধ জনায় । চৰকাৰৰ এই সিদ্ধান্তক এতিয়া ৰাজ্যৰ ফুটবলপ্ৰেমীৰ লগতে ৰেষ্টুৰেণ্ট ব্যৱসায়ীসকলেও উষ্ম আদৰণি জনাইছে ।
লগতে পঢ়ক : বিশিষ্ট অভিনেত্ৰী পূৰৱী শৰ্মাৰ দেহাৱসানত মুখ্যমন্ত্ৰীৰ গভীৰ শোক প্ৰকাশ
