এই অগ্নিকাণ্ডত অঞ্চলটোৰ ব্যস্ত এলেকাত অৱস্থিত কেফে ৭ নামৰ এখন আগশাৰীৰ ৰেষ্টুৰেণ্ট সম্পূৰ্ণৰূপে ভস্মীভূত হয়
মহানগৰীৰ ছয় মাইল অঞ্চলত ৫ জুনৰ পুৱতি নিশা এক ভয়াবহ অগ্নিকাণ্ড সংঘটিত হয় । এই অগ্নিকাণ্ডত অঞ্চলটোৰ ব্যস্ত এলেকাত অৱস্থিত ‘কেফে ৭’ নামৰ এখন ৰেষ্টুৰেণ্ট সম্পূৰ্ণৰূপে ভস্মীভূত হয় । জুইৰ প্ৰকোপ ইমানেই ভয়ংকৰ আছিল যে অতি কম সময়ৰ ভিতৰতে সমগ্ৰ ৰেষ্টুৰেণ্টখন ছাৰখাৰ হৈ পৰে আৰু লাখ লাখ টকাৰ সম্পত্তিৰ ব্যাপক ক্ষতিসাধন হয় ।
প্ৰত্যক্ষদৰ্শী আৰু প্ৰাথমিক খবৰ অনুসৰি, পুৱা প্ৰায় ৩:৩০ বজাত ৰেষ্টুৰেণ্টখনৰ ভিতৰত প্ৰথম জুই দেখা গৈছিল । মুহূৰ্তৰ ভিতৰতে জুইৰ শিখাই সমগ্ৰ চৌহদটো গ্ৰাস কৰি পেলায় । স্থানীয় ৰাইজে ততাতৈয়াকৈ অগ্নিনিৰ্বাপক বাহিনীক খবৰ দিয়ে । ঘটনাৰ খবৰ লাভ কৰি অগ্নিনিৰ্বাপক বাহিনীৰ কেইবাখনো গাড়ী ঘটনাস্থলীত উপস্থিত হয় আৰু যুদ্ধকালীন তৎপৰতাৰে জুই নিৰ্বাপনৰ কামত নিয়োজিত হয় । প্ৰায় আধা ঘণ্টাৰ অহোপুৰুষাৰ্থ প্ৰচেষ্টাৰ অন্তত পুৱা প্ৰায় ৪ বজাত জুই সম্পূৰ্ণৰূপে নিয়ন্ত্ৰণলৈ আনিবলৈ সক্ষম হয় ।
সৌভাগ্যক্ৰমে, পুৱতি নিশা সংঘটিত হোৱা বাবে এই ঘটনাত কোনো লোক হতাহত হোৱা নাই । কিন্তু অগ্নিকাণ্ডৰ ফলত ৰেষ্টুৰেণ্টখনৰ আচবাব, পাকঘৰৰ সঁজুলি আৰু অন্যান্য সামগ্ৰীসহ ৫০ লাখ টকাতকৈও অধিক মূল্যৰ সম্পত্তি ভস্মীভূত হোৱা বুলি ধাৰণা কৰা হৈছে ।
প্ৰাথমিক তদন্তৰ অন্তত অগ্নিনিৰ্বাপক বাহিনী আৰু আৰক্ষীয়ে সন্দেহ প্ৰকাশ কৰা মতে, বৈদ্যুতিক চৰ্ট চাৰ্কিটৰ বাবেই এই অগ্নিকাণ্ডৰ সূত্ৰপাত হৈছে । অৱশ্যে, অগ্নিকাণ্ডৰ প্ৰকৃত কাৰণ এতিয়াও নিশ্চিত হোৱা নাই । কৰ্তৃপক্ষই ঘটনাৰ সন্দৰ্ভত অধিক তদন্ত অব্যাহত ৰাখিছে আৰু ক্ষয়-ক্ষতিৰ সম্পূৰ্ণ পৰিমাণ মূল্যায়ন কৰিবলৈ চেষ্টা চলাইছে ।
লগতে পঢ়ক : জালুকবাৰীত ভয়ংকৰ অগ্নিকাণ্ড, চিৰদিনলৈ শেষ হৈ গ’ল এটা পৰিয়াল
