অসমত প্ৰতিষ্ঠানিক প্ৰসৱ আৰু দক্ষ স্বাস্থ্যসেৱা বৃদ্ধি: মুখ্যমন্ত্রী ড° হিমন্ত বিশ্ব শৰ্মা
মুখ্যমন্ত্রী ড° হিমন্ত বিশ্ব শৰ্মাই আজি ৰাজ্যখনৰ স্বাস্থ্য খণ্ডৰ এই ইতিবাচক প্ৰগতিৰ দিশটো ডাঙৰকৈ দাঙি ধৰে
ৰাজ্যৰ মাতৃ আৰু শিশু স্বাস্থ্যসেৱাৰ ক্ষেত্ৰত এক উল্লেখনীয় অগ্ৰগতিৰ খবৰ পোহৰলৈ আহিছে । মুখ্যমন্ত্রী ড° হিমন্ত বিশ্ব শৰ্মাই আজি ৰাজ্যখনৰ স্বাস্থ্য খণ্ডৰ এই ইতিবাচক প্ৰগতিৰ দিশটো ডাঙৰকৈ দাঙি ধৰে । তেওঁ উল্লেখ কৰে যে বৰ্তমান অসমত প্ৰতি দহটা শিশুৰ জন্মৰ ভিতৰত প্ৰায় নটা জন্মই দক্ষ স্বাস্থ্যকৰ্মীৰ তত্ত্বাৱধানত সম্পন্ন হৈছে ।
ছচিয়েল মিডিয়া প্লেটফৰ্ম ‘X’ (পূৰ্বৰ টুইটাৰ) যোগে এই গুৰুত্বপূৰ্ণ সাফল্যৰ পৰিসংখ্যা শ্বেয়াৰ কৰি মুখ্যমন্ত্ৰীগৰাকীয়ে কয় যে অসমত বৰ্তমান ৮৭.৬ শতাংশ প্ৰসৱ চৰকাৰী তথা ব্যক্তিগত স্বাস্থ্যসেৱা প্ৰতিষ্ঠান (চিকিৎসালয়)সমূহত হয় । আনহাতে, ৯০.৭ শতাংশ প্ৰসৱ দক্ষ স্বাস্থ্যকৰ্মীৰ প্ৰত্যক্ষ তত্ত্বাৱধানত সম্পন্ন হয় । মুখ্যমন্ত্রী ড০ শৰ্মাৰ মতে, এই পৰিসংখ্যাই ৰাজ্যখনৰ চৰকাৰী স্বাস্থ্যসেৱা ব্যৱস্থাৰ প্ৰতি জনসাধাৰণৰ বৰ্ধিত আস্থা আৰু বিশ্বাসকে প্ৰতিফলিত কৰিছে ।
মুখ্যমন্ত্ৰীগৰাকীয়ে লগতে কয় যে এটা শক্তিশালী স্বাস্থ্যসেৱা ব্যৱস্থাৰ আচল প্ৰমাণ মানুহৰ জীৱনৰ আটাইতকৈ গুৰুত্বপূৰ্ণ মুহূৰ্তবোৰত পোৱা যায় । ৰাজ্যখনত বিগত সময়ছোৱাত ব্যাপক হাৰত বৃদ্ধি পোৱা স্বাস্থ্যসেৱাৰ আন্তঃগাঁথনি সম্প্ৰসাৰণ, গ্ৰাম্য আৰু চহৰীয়া অঞ্চলত চিকিৎসকৰ সহজলভ্যতা, মাতৃ আৰু নৱজাতকৰ উন্নত যত্ন সেৱা, আৰু মাতৃ তথা শিশু মৃত্যুৰ হাৰ (MMR and IMR) হ্ৰাস কৰাৰ বাবে চলোৱা ধাৰাবাহিক প্ৰচেষ্টাৰ বাবেই এই উন্নতি সম্ভৱ হৈ উঠিছে ।
অসমজুৰি অধিক চিকিৎসালয় আৰু আধুনিক স্বাস্থ্যসেৱা কেন্দ্ৰ স্থাপনৰ জৰিয়তে গুণগত চিকিৎসা সেৱাৰ সুবিধা সাধাৰণ ৰাইজৰ ওচৰ চপাই নিয়াত চৰকাৰে বিশেষ সফলতা লাভ কৰিছে বুলিও তেওঁ কয় । এই পৰিসংখ্যাই ৰাজ্যজুৰি মাতৃ আৰু নৱজাতকৰ বাবে সুৰক্ষিত প্ৰসৱ আৰু উন্নত স্বাস্থ্যসেৱা নিশ্চিত কৰাৰ ক্ষেত্ৰত ৰাজ্য চৰকাৰৰ নিৰন্তৰ প্ৰতিশ্ৰুতিক পুনৰ প্ৰমাণ কৰা বুলি মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰে ।
লগতে পঢ়ক : অসমক দেশৰ ‘স্পৰ্টচ হাব’ হিচাপে গঢ়ি তোলাৰ লক্ষ্য: কেন্দ্ৰৰ সহযোগিতা বিচাৰিলে মুখ্যমন্ত্ৰীয়ে
