অসমক দেশৰ ‘স্পৰ্টচ হাব’ হিচাপে গঢ়ি তোলাৰ লক্ষ্য: কেন্দ্ৰৰ সহযোগিতা বিচাৰিলে মুখ্যমন্ত্ৰীয়ে
নতুন দিল্লী ভ্ৰমণকালত অসমৰ মুখ্যমন্ত্ৰী ড° হিমন্ত বিশ্ব শৰ্মাই কেন্দ্ৰীয় ক্ৰীড়া মন্ত্ৰী মনসুখ মাণ্ডভীয়াৰ সৈতে এক গুৰুত্বপূৰ্ণ বৈঠকত মিলিত হয়
অসমক দেশৰ ভিতৰতে এক অন্যতম প্ৰধান ক্ৰীড়া কেন্দ্ৰ হিচাপে গঢ়ি তোলাৰ লক্ষ্যৰে এক গুৰুত্বপূৰ্ণ খোজ হাতত লৈছে ৰাজ্য চৰকাৰে । যোৱা ৩১ মে’ত নতুন দিল্লী ভ্ৰমণকালত মুখ্যমন্ত্ৰী ড° হিমন্ত বিশ্ব শৰ্মাই কেন্দ্ৰীয় ক্ৰীড়া মন্ত্ৰী মনসুখ মাণ্ডভীয়াৰ সৈতে এক গুৰুত্বপূৰ্ণ বৈঠকত মিলিত হয় । কেন্দ্ৰীয় মন্ত্ৰীগৰাকীৰ চৰকাৰী আৱাসগৃহত অনুষ্ঠিত এই বৈঠকখনত ৰাজ্যৰ ক্ৰীড়া আন্তঃগাঁথনিৰ সামগ্ৰিক উন্নয়ন আৰু শ্ৰমিক কল্যাণমূলক ব্যৱস্থা সন্দৰ্ভত বিতং আলোচনা কৰা হয় ।
এঘণ্টাতকৈও অধিক সময় ধৰি আলোচনা-
অতি সৌহাৰ্দ্যপূৰ্ণ পৰিৱেশত অনুষ্ঠিত এই বৈঠকখন এঘণ্টাতকৈও অধিক সময় ধৰি চলে । বৈঠকত মুখ্যমন্ত্ৰী ড০ শৰ্মাই সমগ্ৰ অসমতে ক্ৰীড়া আন্তঃগাঁথনিৰ সম্প্ৰসাৰণ আৰু উত্তৰ-পূবৰ যুৱ প্ৰতিভাক বিশ্বদৰবাৰলৈ লৈ যোৱাৰ বাবে কেন্দ্ৰীয় চৰকাৰৰ সহযোগিতা কামনা কৰে । ইয়াৰ উপৰি, ৰাজ্যৰ ‘শ্ৰমজীৱী’ বা শ্ৰমিকসকলৰ কল্যাণৰ বাবে এক অনুকূল আৰু সুৰক্ষিত পৰিৱেশ সৃষ্টি কৰা তথা তেওঁলোকৰ বাবে উন্নত সুযোগ সৃষ্টি কৰাৰ বিষয়টোৱেও আলোচনাত বিশেষ গুৰুত্ব লাভ কৰে ।
‘সেৱাই প্ৰথম’ মন্ত্ৰৰে আগবাঢ়িছে চৰকাৰ-
বৈঠকৰ অন্তত সামাজিক মাধ্যম ‘X’-যোগে এই সন্দৰ্ভত সবিশেষ শ্বেয়াৰ কৰে মুখ্যমন্ত্ৰী ড° হিমন্ত বিশ্ব শৰ্মা ই। বিজেপিৰ মূল আদৰ্শ “সেৱাই প্ৰথম”-ৰ কথা সোঁৱৰাই দি মুখ্যমন্ত্ৰীগৰাকীয়ে কয় যে ৰাজ্যত বিশ্বমানৰ ক্ৰীড়া আন্তঃগাঁথনি গঢ়ি তোলা আৰু শ্ৰমিকসকলৰ সৰ্বাংগীণ কল্যাণ সাধন কৰাই তেওঁলোকৰ মূল লক্ষ্য ।
মুখ্যমন্ত্ৰীগৰাকীয়ে কয়- “মই কেন্দ্ৰীয় মন্ত্ৰী মনসুখ মাণ্ডভীয়া ডাঙৰীয়াক তেওঁৰ জন্মদিনৰ আন্তৰিক শুভেচ্ছা জনালোঁ । অতি আনন্দৰ কথা যে নিজৰ বিশেষ দিনটোতো তেওঁ অসমৰ উন্নয়নমূলক বিষয়সমূহ আলোচনা কৰিবলৈ সময় উলিয়ালে । অসমক ভাৰতৰ ক্ৰীড়া কেন্দ্ৰ হিচাপে গঢ়ি তোলাৰ আমাৰ যি সপোন, তাক বাস্তৱায়িত কৰিবলৈ মই কেন্দ্ৰীয় চৰকাৰৰ ধাৰাবাহিক সহযোগিতা কামনা কৰিছোঁ ।”
ক্ৰীড়া ক্ষেত্ৰত অসমৰ বৃহৎ পদক্ষেপ-
শেহতীয়া বৰ্ষবোৰত অসম চৰকাৰে ক্ৰীড়া ক্ষেত্ৰৰ উত্তৰণৰ বাবে বুজন পৰিমাণৰ ধন বিনিয়োগ কৰিছে । ৰাজ্যখনক কেৱল উত্তৰ-পূবতে নহয়, বৰঞ্চ সমগ্ৰ দেশৰে এক আগশাৰীৰ ক্ৰীড়া গন্তব্যস্থান হিচাপে প্ৰতিষ্ঠা কৰাৰ বাবে কেইবাটাও ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ খেল অনুষ্ঠিত কৰা হৈছে । ৰাজ্য চৰকাৰৰ মতে, গ্ৰামাঞ্চলৰ যুৱ প্ৰতিভাক লালন-পালন কৰা, আধুনিক ক্ৰীড়া সুবিধা যোগান ধৰা আৰু ডাঙৰ খেলসমূহক অসমলৈ আকৰ্ষণ কৰাটোৱে অনাগত দিনত ৰাজ্যখনৰ উন্নয়নৰ কাৰ্যসূচীত এক ডাঙৰ ভূমিকা পালন কৰিব ।
লগতে পঢ়ক : ৰে’ল মন্ত্ৰী অশ্বিনী বৈষ্ণৱক সাক্ষাৎ মুখ্যমন্ত্ৰী হিমন্ত বিশ্ব শৰ্মাৰ
