শিক্ষা অব্যাহত ৰাখিবলৈ ইচ্ছা কৰা অনুত্তীৰ্ণ ছাত্ৰ-ছাত্ৰীসকলে পৰৱৰ্তী পৰীক্ষাত অৱতীৰ্ণ হোৱাৰ পূৰ্বে পুনৰ দশম শ্ৰেণীত নামভৰ্তি কৰাটো বাধ্যতামূলক কৰা হৈছে
অসম ৰাজ্যিক বিদ্যালয় শিক্ষা পৰিষদ (ASSEB), ডিভিজন-১এ ২০২৬ চনৰ হাইস্কুল শিক্ষান্ত পৰীক্ষাত উত্তীৰ্ণ হ’ব নোৱাৰা ছাত্ৰ-ছাত্ৰীসকলৰ বাবে এক গুৰুত্বপূৰ্ণ নিৰ্দেশনা জাৰি কৰিছে । পৰিষদৰ শেহতীয়া জাননী অনুসৰি, শিক্ষা অব্যাহত ৰাখিবলৈ ইচ্ছা কৰা অনুত্তীৰ্ণ ছাত্ৰ-ছাত্ৰীসকলে পৰৱৰ্তী পৰীক্ষাত অৱতীৰ্ণ হোৱাৰ পূৰ্বে পুনৰ দশম শ্ৰেণীত নামভৰ্তি কৰাটো বাধ্যতামূলক কৰা হৈছে ।
পুনৰ নামভৰ্তিৰ নিয়মসমূ :
বিদ্যালয় নিৰ্বাচন: ছাত্ৰ-ছাত্ৰীসকলে নিজৰ পূৰ্বৰ বিদ্যালয়ত পুনৰ নামভৰ্তি কৰিব পাৰিব । যদি সেই বিদ্যালয়ত আসনৰ অভাৱ থাকে, তেন্তে তেওঁলোকে একেটা পৰীক্ষা কেন্দ্ৰৰ অন্তৰ্গত অন্য এখন বিদ্যালয়ত নামভৰ্তি কৰিবলৈ সুযোগ পাব ।
পঞ্জীয়ন নম্বৰ: ছাত্ৰ-ছাত্ৰীসকলে তেওঁলোকৰ পুৰণি পঞ্জীয়ন নম্বৰ ব্যৱহাৰ কৰিব পাৰিব ।
বিষয় পৰিৱৰ্তন: অৰ্ধ-বাৰ্ষিক পৰীক্ষাৰ পূৰ্বে ঐচ্ছিক বিষয় সলনি কৰাৰ সুবিধা থাকিব । অৰ্ধ-বাৰ্ষিক পৰীক্ষাৰ পিছত কোনো বিষয় পৰিৱৰ্তন কৰিবলৈ দিয়া নহ’ব ।
অৰ্ধ-বাৰ্ষিক পৰীক্ষা: পুনৰ নামভৰ্তি কৰা ছাত্ৰ-ছাত্ৰীসকলৰ বাবে অৰ্ধ-বাৰ্ষিক পৰীক্ষাত অংশগ্ৰহণ কৰাটো বাধ্যতামূলক । অন্যথা, তেওঁলোক পৰৱৰ্তী HSLC পৰীক্ষাত বহিবলৈ যোগ্য বিবেচিত নহ’ব ।
বিদ্যালয়ৰ দায়িত্ব: বিদ্যালয়সমূহে ছাত্ৰ-ছাত্ৰীসকলৰ উপস্থিতি নিৰীক্ষণ কৰাৰ লগতে প্ৰয়োজন সাপেক্ষে সংশোধনী শ্ৰেণী প্ৰদান কৰিব লাগিব । লগতে ব্যৱহাৰিক পৰীক্ষাৰ নম্বৰসমূহ সঠিক সময়ত পৰিষদলৈ প্ৰেৰণ কৰিব লাগিব ।
শেষ তাৰিখ: পৰিষদে সকলো বিদ্যালয়ক অহা ১৪ আগষ্ট, ২০২৬ তাৰিখৰ ভিতৰত এই নামভৰ্তি প্ৰক্ৰিয়া সম্পূৰ্ণ কৰিবলৈ কঠোৰ নিৰ্দেশ দিছে ।
লগতে পঢ়ক : অসম চৰকাৰৰ ডাঙৰ সিদ্ধান্ত: বিধায়ক পুঁজিৰ পৰিমাণ বৃদ্ধি
