Assam Child Marriage Crackdown: ৰাজ্যজুৰি অবৈধ স্বামী বিচাৰি আৰক্ষীৰ অভিযান, ২৪ ঘণ্টাত গ্ৰেপ্তাৰ ১৬২ জন
Assam Child Marriage Crackdown: বাল্যবিবাহৰ বিৰুদ্ধে অসম আৰক্ষীৰ বৃহৎ অভিযান।
বাল্যবিবাহৰ বিৰুদ্ধে অভিযান অধিক তীব্ৰ কৰি তুলিছে অসম আৰক্ষীয়ে। ৰাজ্য চৰকাৰৰ এই অভিযানৰ অংশ হিচাপে যোৱা ২৪ ঘণ্টাত ৰাজ্যৰ বিভিন্ন প্ৰান্তৰ পৰা ১৬২ জন লোকক গ্ৰেপ্তাৰ কৰা হৈছে। বাল্যবিবাহৰ দৰে সামাজিক ব্যাধি সম্পূৰ্ণৰূপে নিৰ্মূল কৰাৰ লক্ষ্যৰে এই অভিযান অব্যাহত ৰাখিছে চৰকাৰে (Assam Child Marriage Crackdown)।
আৰক্ষীয়ে ধুবুৰী, দক্ষিণ শালমাৰা, বৰপেটা, গোৱালপাৰা, নগাঁওকে ধৰি কেইবাখনো জিলাত অভিযান চলায়। ইয়াৰ উপৰি বিলাসীপাৰা, জুৰীয়া আৰু গোঁসাইগাঁও অঞ্চলতো চলোৱা হয় অভিযান। আৰক্ষীৰ তথ্য অনুসৰি, ধুবুৰীত ৬২ জন, গোৱালপাৰাত ৫০ জন আৰু দক্ষিণ শালমাৰাত ৩০ জন লোকক বাল্য বিবাহৰ অপৰাধত গ্ৰেপ্তাৰ কৰা হৈছে। আনহাতে, বিলাসীপাৰাত ৮ জন, নগাঁৱত ৫ জন, জুৰীয়াত ৫ জন আৰু গোঁসাইগাঁৱত ২ জন লোক আৰক্ষীৰ জালত পৰিছে।
মুখ্যমন্ত্ৰী হিমন্ত বিশ্ব শৰ্মাই ২০২৬ চনৰ শেষৰ ভিতৰত অসমক বাল্যবিবাহমুক্ত ৰাজ্য হিচাপে গঢ়ি তোলাৰ লক্ষ্য নিৰ্ধাৰণ কৰিছে। সেই লক্ষ্য আগত ৰাখিয়েই ৰাজ্য চৰকাৰে অব্যাহত ৰাখিছে এই অভিযান (Child Marriage Free Assam)।
বাল্যবিবাহৰ গোচৰত কঠোৰ আইনী ব্যৱস্থা গ্ৰহণৰ ওপৰতো গুৰুত্ব দিছে চৰকাৰে। ১৪ বছৰৰ তলৰ ছোৱালীৰ সৈতে জড়িত গোচৰত যৌন অপৰাধৰ পৰা শিশুক সুৰক্ষা প্ৰদান আইন, ২০১২ (POCSO) প্ৰয়োগ কৰা হৈছে। আনহাতে, ১৪ৰ পৰা ১৮ বছৰৰ ভিতৰৰ ছোৱালীৰ ক্ষেত্ৰত বাল্যবিবাহ নিষেধ আইন, ২০০৬ অনুসৰি ব্যৱস্থা গ্ৰহণ কৰা হৈছে।
কেৱল বাল্যবিবাহ কৰা লোকৰ বিৰুদ্ধেই নহয়, এনে বিবাহৰ আয়োজন কৰা বা সম্পন্ন কৰাত সহায় কৰা লোকসকলৰ বিৰুদ্ধেও ব্যৱস্থা গ্ৰহণ কৰিছে আৰক্ষীয়ে। প্ৰমাণৰ ভিত্তিত বাল্যবিবাহ সম্পন্ন কৰোৱা ধৰ্মীয় কৰ্মকৰ্তা আৰু বিবাহ পঞ্জীয়কসকলৰ বিৰুদ্ধেও আইনী ব্যৱস্থা লোৱাৰ ক্ষেত্ৰত গুৰুত্ব দিয়া হৈছে।
ইফালে, নাবালক-নাবালিকাৰ বিবাহ পঞ্জীয়ন ৰোধ কৰিবলৈও নতুন পদক্ষেপ গ্ৰহণ কৰিছে ৰাজ্য চৰকাৰে। ইয়াৰ অংশ হিচাপে বিবাহৰ পঞ্জীয়নৰ সময়ত বয়স নিশ্চিত কৰাৰ বাবে বাধ্যতামূলক ব্যৱস্থা শক্তিশালী কৰা হৈছে।
বাল্যবিবাহৰ বিৰুদ্ধে চলোৱা অভিযানৰ অধীনত ৰাজ্যত ইতিমধ্যে হাজাৰ হাজাৰ গোচৰ ৰুজু কৰাৰ লগতে বহু লোকক গ্ৰেপ্তাৰো কৰা হৈছে। বাল্যবিবাহ সম্পূৰ্ণৰূপে বন্ধ কৰাৰ লক্ষ্যৰে অসম চৰকাৰে এই অভিযান অব্যাহত ৰাখিছে।
লগতে পঢ়ক: Guwahati Hotel Shooting: পোহৰলৈ হোটেল বিলাস ইন কাণ্ডৰ ন-ন তথ্য
