নগাঁও লোকসভা উপ-নিৰ্বাচনৰ বাবে সকলো প্ৰাৰ্থীয়ে প্ৰচাৰ চলাইছে। তাৰ মাজতে বদৰুদ্দিন আজমলে কয় যে তেওঁ এক লাখ ভোটৰ ব্যৱধানত বিজয়ী হ’ব।
AIUDFৰ মুৰব্বী তথা লোকসভাৰ প্ৰাক্তন সাংসদ বদৰুদ্দিন আজমলে মনোনয়ন পত্ৰ দাখিল কৰাৰ এদিন পাছত নগাঁও জিলাৰ কচুৱা তিনিআলিত ভোটাৰসকলৰ মাজত নির্বাচনী প্ৰচাৰ চলায়।
প্ৰচাৰৰ সময়ত ৰাইজক সম্বোধন কৰি বদৰুদ্দিন আজমলে কয় যে কচুৱাৰ ৰাইজৰ সমৰ্থন আৰু মৰম-স্নেহ পোৱা প্ৰাৰ্থীজনেই বিজয়ী হ’ব।
বদৰুদ্দিন আজমলে লগতে দাবী কৰে যে তেওঁ নগাঁও উপ-নিৰ্বাচনত এক লাখ ভোটৰ ব্যৱধানত বিজয়ী হ’ব। তেওঁ উল্লেখ কৰে যে মূল নিৰ্বাচনী যুঁজখন কংক্ৰেছ, বিজেপি আৰু AIUDF-ৰ মাজতেই হ’ব।
মুখ্যমন্ত্ৰী ড০ হিমন্ত বিশ্ব শৰ্মাৰ সৈতে তেওঁৰ সম্পৰ্কক লৈ সাংবাদিকে সোধা এক প্ৰশ্নৰ উত্তৰত অজমলে কয় যে মুখ্যমন্ত্ৰীৰ সৈতে সকলোৰে সম্পৰ্ক থাকে।
১৬ ছেপ্টেম্বৰত মনোনয়ন পত্ৰ দাখিল কৰাৰ পাছত AIUDF প্ৰধানগৰাকী নিৰ্বাচনী প্ৰচাৰৰ অংশ হিচাপে কচুৱাত উপস্থিত হৈছিল।
ইফালে, বৃহস্পতিবাৰে অল ইণ্ডিয়া ইউনাইটেড ডেম’ক্ৰেটিক ফ্ৰণ্ট (AIUDF)-ৰ মুৰব্বী বদৰুদ্দিন আজমলে আগন্তুক নগাঁও উপ-নিৰ্বাচনৰ বাবে মনোনয়ন পত্ৰ দাখিল কৰাৰ পাছত কংগ্ৰেছক তীব্ৰ সমালোচনা কৰে। বদৰুদ্দিন আজমলে দাবী কৰে যে তেওঁ নিৰ্বাচনত প্ৰতিদ্বন্দ্বিতা কৰাৰ সিদ্ধান্তই বিৰোধী দলটোৰ নিৰ্বাচনী ৰণনীতি বিফল কৰি পেলাইছে।
বদৰুদ্দিন আজমলে কয় যে তেওঁ নিৰ্বাচনী যুঁজত অৱতীৰ্ণ হোৱাৰ বাবেই কংগ্ৰেছ এতিয়া “উত্তপ্ত” হৈ পৰিছে। AIUDF-ৰ পৰা তেওঁক টিকট দিয়াৰ পাছত কংগ্ৰেছৰ পৰিকল্পনা বিধ্বস্ত হোৱা বুলিও তেওঁ অভিযোগ উত্থাপন কৰে।
মনোনয়ন প্ৰপত্ৰ দাখিল কৰাৰ পাছত বদৰুদ্দিন আজমলে কয়, “বদৰুদ্দিন আজমলে টিকট দিয়াৰ বাবে ৰকিবুলৰ সমগ্ৰ পৰিকল্পনা বিফল হৈছে। কংগ্ৰেছ এতিয়া হতাশ হৈ পৰিছে।”
লগতে পঢ়ক: ‘কংগ্ৰেছক ভোট দিয়া আৰু বিজেপিক ভোট দিয়া একেই কথা’; বদৰুদ্দিন আজমল
