জুবিনক্ষেত্ৰত উপস্থিত হৈ বন্ধুৰ কথা মনত পেলাই আৱেগিক হৈ পৰিল বলীউডৰ সংগীত শিল্পী তথা জুবিনৰ বন্ধু ছেলিম মাৰ্চেণ্ট।
বলীউডৰ সংগীত শিল্পী তথা জুবিনৰ বন্ধু ছেলিম মাৰ্চেণ্টে হাৰ্টথ্ৰব জুবিন গাৰ্গৰ ষ্টুডিঅ’ আৰু বাসগৃহত উপস্থিত হৈ তেওঁলৈ শ্ৰদ্ধাঞ্জলি জ্ঞাপন কৰাৰ লগতে অসম আৰু অসমীয়া সংগীতৰ প্ৰতি থকা জুবিন গাৰ্গৰ গভীৰ অনুৰাগৰ কথা মনত পেলায়।
এই ভ্ৰমণৰ সময়ত জুবিন গাৰ্গৰ পত্নী গৰিমা গাৰ্গে ছেলিম মাৰ্চেণ্টক এক পৰম্পৰাগত আদৰণি জনায়। ছেলিম মাৰ্চেণ্টে জুবিনৰ ষ্টুডিঅ’তো কিছু সময় অতিবাহিত কৰে আৰু এই ভ্ৰমণক এক গভীৰ আৱেগিক তথা বিশেষ সংগীতৰ মুহূৰ্ত বুলি বৰ্ণনা কৰে। ছেলিম মাৰ্চেণ্টে শেহতীয়াকৈ ‘ভূমি ২০২৬’ ত জুবিন গাৰ্গৰ সংগীতৰ উত্তৰাধিকাৰৰ সৈতে জড়িত “ধুমুহাৰ গান” গীতটো পৰিৱেশন কৰি তেওঁলৈ শ্ৰদ্ধাঞ্জলি জ্ঞাপন কৰিছিল।
এই ভ্ৰমণৰ পাছত ছেলিম মাৰ্চেণ্টে ছ’চিয়েল মিডিয়াৰ জৰিয়তে নিজৰ আৱেগ প্ৰকাশ কৰাৰ লগতে জুবিনৰ পৰিয়াল আৰু তেওঁক আতিথ্য প্ৰদান কৰাসকললৈ কৃতজ্ঞতা জ্ঞাপন কৰে।
ছেলিম মাৰ্চেণ্টে জুবিন আৰু অসমৰ প্ৰতি তেওঁৰ মৰম প্ৰকাশ কৰি আৰু কয়, “মই বহুত আৱেগিক আৰু অভিভূত হৈ পৰিছোঁ। মই জুবিনক ভাল পাওঁ, মই অসমক ভাল পাওঁ আৰু মই সদায় অসমীয়া সংগীতক সমৰ্থন কৰি যাম।”
তেওঁৰ এই ভ্ৰমণে অসমীয়া সংগীতলৈ জুবিন গাৰ্গৰ অম্লান অৱদান আৰু সমগ্ৰ ভাৰতৰ শিল্পীসকলৰ সৈতে থকা তেওঁৰ সুদৃঢ় সম্পৰ্কৰ প্ৰতি আন এক শ্ৰদ্ধাঞ্জলি হিচাপে প্ৰতিফলিত হৈছে।
জুবিন গাৰ্গৰ বাসগৃহ আৰু ষ্টুডিঅ’ত কিছু সময় অতিবাহিত কৰাৰ পিছত জুবিনক্ষেত্ৰত উপস্থিত বলীউডৰ সংগীত শিল্পী ছেলিম মাৰ্চেণ্ট। জুবিন ক্ষেত্ৰত নাম-প্ৰসংগত অংশ ল’লে জনপ্ৰিয় সংগীতশিল্পী গৰাকীয়ে। জুবিনক্ষেত্ৰত উপস্থিত হৈ বলীউডৰ সংগীত শিল্পী গৰাকীয়ে কয় যে, ‘মানৱতাৰ নিদৰ্শন বিলাই জুবিন গুচি গ’ল কিন্তু তেওঁ এতিয়াও আমাৰ মাজত আছে। ইমান মৰম, মানৱীয়তা বিলাই থৈ গৈছে যে জুবিন সদায় অমৰ হৈ থাকিব। জুবিনক্ষেত্ৰলৈ অহা প্ৰতিগৰাকী ব্যক্তিয়ে প্ৰেম, মানৱতা আৰু সংগীতৰ বাৰ্তা লাভ কৰিব’।
লগতে পঢ়ক: ‘বিবাহিত পুৰুষৰ লগত প্ৰেমৰ সম্পৰ্ক থকা মহিলা নাৰীবাদী নহয়’; তনীষা মুখাৰ্জী
