মুখ্যমন্ত্ৰী ড০ হিমন্ত বিশ্ব শৰ্মাই কেবিনেটৰ এই সিদ্ধান্তসমূহৰ বিষয়ে আনুষ্ঠানিকভাৱে ঘোষণা কৰে
অসম মন্ত্ৰীসভাই ২৫ জুলাইত অনুষ্ঠিত কেবিনেট বৈঠকত কেইবাটাও গুৰুত্বপূৰ্ণ সিদ্ধান্তত অনুমোদন জনায় । বৈঠকৰ অন্তত মুখ্যমন্ত্ৰী ড০ হিমন্ত বিশ্ব শৰ্মাই কেবিনেটৰ এই সিদ্ধান্তসমূহৰ বিষয়ে আনুষ্ঠানিকভাৱে ঘোষণা কৰে ।
সম্পত্তি পঞ্জীয়ন ব্যৱস্থাত ব্যাপক সংস্কাৰ
সম্পত্তিৰ লেনদেনত স্বচ্ছতা বৃদ্ধি আৰু আইনী বিবাদ ৰোধ কৰাৰ লক্ষ্যেৰে ৰাজ্যৰ পঞ্জীয়ন ব্যৱস্থাৰ আধুনিকীকৰণ কৰা হৈছে । নতুন নীতি অনুসৰি:
ভাৰ্চুৱেল আৰু ফেচলেছ (মুখহীন) পঞ্জীয়ন: পঞ্জীয়ন প্ৰক্ৰিয়া অধিক সহজ আৰু স্বচ্ছ কৰিবলৈ আধুনিক ব্যৱস্থা প্ৰৱৰ্তন কৰা হ’ব ।
বাধ্যতামূলক পঞ্জীয়নৰ পৰিসৰ সম্প্ৰসাৰণ: এতিয়াৰে পৰা বিক্ৰীৰ চুক্তি, উন্নয়নমূলক চুক্তি, পাৱাৰ অৱ এটৰ্নী, হ্ৰস্বম্যাদী লিজ, ইকুইটেবল বন্ধকী, বিক্ৰী প্ৰমাণপ্ৰত্ৰ, বেংক গেৰাণ্টী, একত্ৰীকৰণ/বিভাজনৰ জৰিয়তে হস্তান্তৰ আৰু স্থাৱৰ সম্পত্তি জড়িত অংশীদাৰিত্বৰ চুক্তি বাধ্যতামূলকভাৱে পঞ্জীয়ন কৰিব লাগিব ।
চিকিৎসা শিক্ষাৰ নামভৰ্তিত নীতিগত সালসলনি
প্ৰাগজ্যোতিষ চিকিৎসা মহাবিদ্যালয়ৰ নিৰ্মাণ সম্পূৰ্ণ হোৱাৰ পিছতে ৰাজ্যৰ চিকিৎসা মহাবিদ্যালয়সমূহত সংৰক্ষণৰ পৰিসৰ বৃদ্ধি কৰা হৈছে :
খিলঞ্জীয়াৰ সংৰক্ষণ বৃদ্ধি: টাই আহোম জনগোষ্ঠীৰ বাবে ১০ খনৰ পৰা ১১ খনলৈ, চুতীয়া জনগোষ্ঠীৰ ৯ খনৰ পৰা ১০ খনলৈ আৰু কোচ-ৰাজবংশী জনগোষ্ঠীৰ বাবে অতিৰিক্তভাৱে এখন আসন বৃদ্ধি কৰা হৈছে (এই তিনি সম্প্ৰদায়ৰ সন্মিলিত আসন ১৩ ৰ পৰা ১৪ খনলৈ বৃদ্ধি)। আনহাতে, মৰাণ আৰু মটক জনগোষ্ঠীৰ আসন ৮ খনৰ পৰা ৯ খনলৈ বৃদ্ধি কৰা হৈছে ।
অনাথ শিক্ষাৰ্থীৰ বাবে বিশেষ কোটা: পিতৃ-মাতৃ উভয়কে হেৰুওৱা শিক্ষাৰ্থীসকলৰ বাবে পৰীক্ষামূলকভাৱে দুখন MBBS আসন সংৰক্ষণৰ অনুমোদন জনোৱা হৈছে ।
ৰাজ্যিক কোটাৰ নিয়ম শিথিল: কেন্দ্ৰীয় চৰকাৰ, প্ৰতিৰক্ষা সেৱা বা অসম ভৱনত কৰ্মৰত হোৱাৰ বাবে ৰাজ্যৰ বাহিৰত পঢ়া-শুনা কৰা অসমীয়া পৰিয়ালৰ সন্তানসকলেও এতিয়াৰে পৰা ৰাজ্যিক কোটাত সুযোগ পাব । ইয়াৰ বাবে পিতৃ-মাতৃৰ অসমত তিনিটা প্ৰজন্মৰ বসতিৰ প্ৰমাণ থকাটো বাধ্যতামূলক ।
অন্যান্য গুৰুত্বপূৰ্ণ সিদ্ধান্ত
আয়ুৰ্বেদিক স্বাস্থ্য সেৱা নিয়মাবলী, ২০২৬: আয়ুৰ্বেদিক চিকিৎসা বিষয়াসকলৰ নিযুক্তি আৰু সেৱাৰ প্ৰক্ৰিয়া সুসংগঠিত কৰিবলৈ এই নিয়মাবলীত অনুমোদন জনোৱা হৈছে ।
NAFED-ক দায়িত্ব অৰ্পণ: ৰাজহুৱা বিতৰণ ব্যৱস্থাৰ জৰিয়তে মচুৰ দালি আৰু চেনিৰ সময়োপযোগী যোগান নিশ্চিত কৰিবলৈ ‘নেচনেল এগ্ৰিকালচাৰেল ক’অপাৰেটিভ মাৰ্কেটিং ফেডাৰেচন অৱ ইণ্ডিয়া’-ক নোডেল সংস্থা হিচাপে কৰ্তৃত্ব প্ৰদান কৰা হৈছে ।
লগতে পঢ়ক : মোদী জীৰ বিপক্ষে কৈছে মই দুখ পাইছোঁঃ মন্ত্ৰীৰ কন্যাৰ প্ৰতিবাদত অংশগ্ৰহণক লৈ মুখ্যমন্ত্ৰী
