সাৱধান অসমবাসী! ৩০খন জিলালৈ বতৰ বিজ্ঞান কেন্দ্ৰৰ জৰুৰী জাননী, আহি আছে ধুমুহা-বৰষুণ ।
অসমত বতৰৰ ব্যাপক পৰিৱৰ্তন! ৰাজ্যৰ ভিন্ন প্ৰান্তত হঠাতে সলনি হৈছে বতৰৰ মেজাজ । ইয়াৰ পৰিপ্ৰেক্ষিতত আঞ্চলিক বতৰ বিজ্ঞান কেন্দ্ৰই সমগ্ৰ অসমতে এক বিশেষ বতৰৰ সতৰ্কবাণী জাৰি কৰিছে । ধাৰাসাৰ বৰষুণ, বিজুলী-ধেৰেকণিৰ সৈতে ধুমুহা আৰু ধাৰাবাহিকভাৱে বৃদ্ধি পোৱা গৰম তথা সেমেকা বতৰৰ বাবে ৰাজ্যৰ ৩০খন জিলাক ‘হালধীয়া সতৰ্কবাণী’ (Yellow Alert) জাৰি কৰা হৈছে ।
হালধীয়া সতৰ্কবাণী জাৰি কৰা ৩০খন জিলা কি কি?
বতৰ বিজ্ঞান কেন্দ্ৰৰ তথ্য অনুসৰি, এই হালধীয়া সতৰ্কবাণীৰ অধীনত থকা জিলাসমূহ হৈছে- কোকৰাঝাৰ, ধুবুৰী, দক্ষিণ শালমাৰা, চিৰাং, বঙাইগাঁও, বৰপেটা, গোৱালপাৰা, কামৰূপ, কামৰূপ মহানগৰ, দৰং, মৰিগাঁও, শোণিতপুৰ, নগাঁও, হোজাই, পশ্চিম কাৰ্বি আংলং, কাৰ্বি আংলং, ডিমা হাছাও, কাছাৰ, শ্ৰীভূমি, হাইলাকান্দি, বিশ্বনাথ, গোলাঘাট, লখিমপুৰ, মাজুলী, যোৰহাট, ধেমাজি, শিৱসাগৰ, ডিব্ৰুগড়, চৰাইদেউ আৰু তিনিচুকীয়া ।
১৬খন জিলাত প্ৰচণ্ড গৰম-
ধাৰাসাৰ বৰষুণৰ মাজতে ৰাজ্যৰ ১৬খন জিলাত প্ৰচণ্ড গৰম আৰু সেমেকা বতৰে জনজীৱন অতিষ্ঠ কৰি তুলিব পাৰে বুলি সকীয়াই দিছে বতৰ বিজ্ঞানে । কোকৰাঝাৰ, ধুবুৰী, দক্ষিণ শালমাৰা, চিৰাং, বঙাইগাঁও, বৰপেটা, গোৱালপাৰা, কামৰূপ, কামৰূপ মহানগৰ, দৰং, হোজাই, লখিমপুৰ, মাজুলী, শিৱসাগৰ, চৰাইদেউ আৰু ধেমাজি জিলাত অত্যাধিক তাপমাত্ৰাৰ লগতে বতাহত আৰ্দ্ৰতাৰ পৰিমাণ বৃদ্ধি পাব । ফলত এই অঞ্চলসমূহৰ বাসিন্দা সকলে চৰম অস্বস্তিৰ সন্মুখীন হ’ব পাৰে ।
এই ১০খন জিলাত হ’ব পাৰে ধাৰাসাৰ বৰষুণ আৰু বজ্ৰপাত
আনহাতে, আঞ্চলিক বতৰ বিজ্ঞান কেন্দ্ৰই আন ১০খন জিলাৰ বাবে প্ৰৱল বৰষুণ আৰু ধুমুহাৰ আগজাননী দিছে । মৰিগাঁও, শোণিতপুৰ, নগাঁও, পশ্চিম কাৰ্বি আংলং, কাৰ্বি আংলং, বিশ্বনাথ, গোলাঘাট, যোৰহাট, ডিব্ৰুগড় আৰু তিনিচুকীয়া জিলাৰ কিছু কিছু ঠাইত বিজুলী-ধেৰেকণিৰ সৈতে ধাৰাসাৰ বৰষুণ আৰু জাকা বা বতাহ জোকৰাৰ সম্ভাৱনা আছে ।
বতৰ বিজ্ঞান কেন্দ্ৰৰ গুৰুত্বপূৰ্ণ পৰামৰ্শ :
হঠাতে হোৱা এই বতৰৰ পৰিৱৰ্তন, বিজুলী মৰা, তীব্ৰ বেগী বতাহ আৰু ধাৰাসাৰ বৰষুণে সাধাৰণ জনজীৱন ব্যাহত কৰিব পাৰে । গতিকে, বিশেষকৈ ধুমুহা-বৰষুণৰ পূৰ্বাভাস থকা জিলাসমূহৰ বাসিন্দাসকলক সতৰ্ক হৈ থাকিবলৈ কোৱা হৈছে । ঘৰৰ পৰা বাহিৰলৈ ওলাই যাওঁতে প্ৰয়োজনীয় সাৱধানতা অৱলম্বন কৰিবলৈ ৰাইজক বিশেষভাৱে আহ্বান জনোৱা হৈছে ।
লগতে পঢ়ক : ৰাজ্যত প্ৰচণ্ড গৰমক লৈ উদ্বিগ্ন মুখ্যমন্ত্ৰী, ৰাজ্যবাসীক জনালে বিশেষ আহ্বান
