কেতিয়াও উভতি নহাৰ বাটেৰে গ’লগৈ জনপ্ৰিয় অভিনেত্ৰী পূৰৱী শৰ্মা । জনপ্ৰিয় অভিনেত্ৰীগৰাকীক হেৰুৱাই শোকাহত ৰাজ্যবাসী । বিশিষ্ট অভিনেত্ৰীগৰাকীৰ বিয়োগত শোকপ্ৰকাশ মুখ্যমন্ত্ৰী ড০ হিমন্ত বিশ্ব শৰ্মাৰ ।
পৰিয়াল তথা ৰাজ্যবাসীক শোকৰ সাগৰত পেলাই ইহ সংসাৰৰ পৰা চিৰ বিদায় ল’লে জনপ্ৰিয় অভিনেত্ৰী পূৰৱী শৰ্মাই । ১৪ জুলাই, মঙলবাৰে সন্ধিয়া প্ৰায় ৭:৩০ বজাত গুৱাহাটীত হৃদযন্ত্ৰৰ ক্ৰিয়া বন্ধ হৈ অভিনেত্ৰীগৰাকীৰ আকস্মিক দেহাৱসান ঘটে ।
আজি সন্ধিয়া শাৰীৰিক অৱস্থাৰ অৱনতি ঘটাৰ লগে লগে তেওঁক ততাতৈয়াকৈ চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত ঘোষণা কৰে । মৃত্যুৰ সময়ত তেওঁৰ বয়স হৈছিল প্ৰায় ৬৮ বছৰ ।
কেইবা দশক ধৰি আঞ্চলিক চলচ্চিত্ৰ উদ্যোগলৈ অনবদ্য অৱদান আগবঢ়াই যোৱা বলিষ্ঠ অভিনেত্ৰীগৰাকীৰ বিয়োগত শোক প্ৰকাশ কৰিছে ৰাজ্যৰ মুখ্যমন্ত্ৰিী ড০ হিমন্ত বিশ্ব শৰ্মাই । বিশিষ্ট অভিনেত্ৰীগৰাকীৰ প্ৰয়াত হোৱাৰ বাতৰি লাভ কৰাৰ পিছতে সামাজিক মাধ্যমযোগে শোক প্ৰকাশ কৰিছে মুখ্যমন্ত্ৰীগৰাকীয়ে ।
ফেচবুকযোগে মুখ্যমন্ত্ৰী ড০ শৰ্মাই শোক প্ৰকাশ কৰি লিখিছে- “অসমীয়া চলচ্চিত্ৰ জগতৰ জনপ্ৰিয় অভিনেত্ৰী পূৰৱী শৰ্মা ডাঙৰীয়ানীৰ আকস্মিক আৰু অকাল বিয়োগৰ বাতৰিয়ে মোক গভীৰভাৱে মৰ্মাহত কৰিলে৷ অসমীয়া চলচ্চিত্ৰ, ভ্ৰাম্যমাণ থিয়েটাৰ, দূৰদৰ্শন আৰু আকাশবাণীৰ জগতখনত নিজৰ অনন্য প্ৰতিভাৰে উজ্জ্বল স্বাক্ষৰ ৰাখি যোৱা পূৰৱী শৰ্মাই কেইবাটাও দশক ধৰি স্বকীয় অভিনয়শৈলীৰে অগণন দৰ্শক-শ্ৰোতাৰ হৃদয় জয় কৰিছিল। ৰূপালী পৰ্দাত তেখেতে জীৱন্ত কৰি তোলা অসংখ্য চৰিত্ৰ, বিশেষকৈ নায়িকাৰূপে তেখেতৰ অনবদ্য অভিনয়, অসমীয়া চলচ্চিত্ৰপ্ৰেমীৰ মনত চিৰদিন সজীৱ হৈ থাকিব।“
তেওঁ আৰু লিখিছে- “তেখেতৰ প্ৰয়াণে অসমীয়া শিল্প-সংস্কৃতি জগতখনত এক শূন্যতাৰ সৃষ্টি কৰিলে। এগৰাকী গুণী শিল্পী হিচাপে তেখেতে এৰি যোৱা সৃষ্টিৰাজি, শিল্পসাধনা চিৰদিন চলচ্চিত্ৰপ্ৰেমীক অনুপ্ৰাণিত কৰিব।
বিদেহ আত্মাৰ চিৰশান্তি কামনাৰ লগতে তেখেতৰ স্বামী, বিশিষ্ট অভিনেতা শ্ৰীতপন দাস ডাঙৰীয়া তথা শোকসন্তপ্ত পৰিয়ালবৰ্গ, আত্মীয়-স্বজন, সহশিল্পী আৰু অগণন অনুৰাগীলৈ গভীৰ সমবেদনা জ্ঞাপন কৰিলোঁ ।
ওঁম শান্তি”
উল্লেখ্য যে, জনপ্ৰিয় অভিনেত্ৰীগৰাকীৰ মৃত্যুৰ খবৰ বিয়পি পৰাৰ পিছতে ৰাজ্যৰ শিল্পী, কলা-কুশলীৰ লগতে অসংখ্য অনুৰাগী তেখেতৰ বাসগৃহত শ্ৰদ্ধাঞ্জলি জনাবলৈ উপস্থিত হোৱা পৰিলক্ষিত হৈছে ।
লগতে পঢ়ক : অসমীয়া বোলছবিজগতৰ বিশিষ্ট অভিনেত্ৰী পূৰৱী শৰ্মাৰ দেহাৱসান
